Alvarlegt umferðarslys átti sér stað á Vesturlandsvegi á Kjalarnesi á fjórða tímanum í dag þegar tvö mótorhjól og húsbíll lentu í árekstri. Þrjú voru flutt alvarlega slösuð á bráðamóttöku eftir slysið.
Ásgeir Þór Ásgeirsson, yfirlögregluþjónn, sagði að áreksturinn hafi átt sér sér stað á vegarkafla þar sem nýlagt malbik var nokkuð sleipt eftir rigningu fyrr um daginn.
Sjá einnig: Þrír fluttir alvarlega slasaðir á bráðamóttöku eftir árekstur
Varaði við veginum
Stuttu áður en slysið átti sér stað var varað við téðum vegarkafla í Facebook hópnum Færð og veður á Kjalarnesi. Einn meðlimur hópsins sagði vegarkaflann vera stórhættulegan þar sem fljúgandi hált væri þegar malbikið væri blautt. „Dauðagildra,“ sagði hann að lokum.
Fjöldi fólks tók undir þetta og lýstu því að hafa lent í hremmingum á svæðinu. „Í rigningunni á föstudag hélt ég að ég væri að missa dekk undan bílnum þegar hann fór að rása svona mikið. Stoppaði einmitt við vigtarplanið til að athuga með það og gerði mér þá grein fyrir hversu hættulegur vegurinn er í rigningu,“ sagði einn meðlimur hópsins.
Missti stjórn í rigningunni
„Þetta malbik er dauðagildra. Bíllinn skautar endalaust á þessu og missir allt grip. Hræðilegt alveg hreint,“ sagði annar sem hafði slæma reynslu af veginum. „Hvað þurfa margir að deyja svo að þetta verði lagað!“
Einn notandi benti á að svokallaðir tjöruvegir líkt og sá sem um ræðir væru ódýrari í framleiðslu en steyptir vegir og því vinsæll kostur hjá Vegagerðinni þrátt fyrir að oft þurfi að gera við þá.
Ekki náðist í Vegagerðina við gerð fréttarinnar.