Útför Johns Snorra Sigurjónssonar, sem saknað hefur verið síðan 5. febrúar síðastliðinn, fer fram í Vídalínskirkju þriðjudaginn 22. júní næstkomandi.
John Snorri var í hópi fjallgöngumanna sem freistuðu þess að verða fyrstir til að klífa K2, næsthæsta fjall heims, að vetri til. Viðamikil leit var gerð að John Snorra og félögum hans, Ali Sadpara og Juan Pablo Mohr en leitin bar ekki árangur.
Ferða- og íþróttamálaráðherra Pakistans tilkynnti þann 18. febrúar að fjallgöngumennirnir væru taldir af. John Snorri var einn öflugasti fjallgöngumaður heims og naut hann mikillar virðingar meðal annarra göngumanna.
Lína Móey Bjarnadóttir, eiginkona Johns Snorra, birtir tilkynningu um útförina á Facebook-síðu sinni og tilkynningu sem birtist í Morgunblaðinu.
„John Snorri er í huga og hjarta okkar alla daga,“ segir Lína Móey meðal annars í færslu sinni.