Sex nemendur í Borgarholtsskóla voru fluttir á slysadeild eftir árás í skólanum skömmu eftir hádegið. Vísir greinir frá þessu en Elín Agnes Kristínardóttir, aðstoðaryfirlögregluþjónn á höfuðborgarsvæðinu, hafði ekki frekari upplýsingar um líðan nemendanna.
Vísir greindi fyrst frá því að maður, vopnaður hafnaboltakylfu og hníf, hafi mætt í skólann og ráðist á nemanda. Elín segir við Vísi að hún viti ekki hvort hnífi hafi verið beitt.
Fréttablaðið greinir frá því að sérsveitin hafi verið kölluð út vegna málsins ásamt lögreglu og sjúkrabílum. Þá hefur Fréttablaðið eftir Valgarði Valgarðssyni aðalvarðstjóra að enginn sé alvarlega slasaður.
Maðurinn var handtekinn af lögreglu og er rannsókn málsins á frumstigi. Ekki er vitað hvað manninum gekk til.