„Ég hef aldrei lent í þessu áður og þess vegna var ég mjög undrandi en samt mjög glaður yfir því hversu góðhjartaður þessi ungi starfsmaður var í raun og veru.“
Þetta segir maður að nafni Össur í færslu sem birtist í Facebook-hópnum Jákvæðasta grúbban á Íslandi. Í hópnum deila meðlimir jákvæðum sögum úr hversdagslífinu. Segja má að þörfin fyrir jákvæðar og uppbyggilegar fréttir hafi sjaldan verið meiri en einmitt nú á tímum COVID-19.
Í frásögn sinni segir Össur sagan hafi gerst fyrir um ári en þá bjó hann nálægt RÚV við Efstaleiti.
„Ég gekk oft mér til heilsubótar í nokkur skipti niður í Elliðaárdal. Ég hafði meðferðis bakpoka og þegar ég var á heimleið datt mér í hug að koma við í Nettó í Mjódd og kaupa mér appelsínur á 50% afslætti sem og ég gerði,“ segir Össur en úr varð að hann greip með sér um það bil 15 kíló af appelsínum.
„En þegar kom að því að greiða vöruna, var ég peninga- og greiðslukortalaus, ég ætlaði að greiða vöruna með bankaappinu, en það virkaði ekki og hefur ekki virkað hingað til,“ segir Össur en þarna voru góð ráð dýr. Hann spurði ungan starfsmann verslunarinnar hvort hann gæti aðstoðað hann. Úr varð að starfsmaðurinn ungi greiddi fyrir vöruna með eigin bankaappi. Össur millifærði svo á hann um leið úr símaappinu sínu.
„Í þetta skipti bjargaði starfsmaður í Nettó mér fyrir horn. Ég hef aldrei lent í þessu áður og þess vegna var ég mjög undrandi en samt mjög glaður yfir því hversu góðhjartaður þessi ungi starfsmaður var í raun og veru. Ég þakkaði honum vel fyrir greiðan og kom einnig boðum til hans í gegnum yfirmenn hans með þakklæti fyrir þennan óvænta glaðning og hjálpsemi. Maður á að hrósa öllum sem gera góðverk gagnvart náunganum, það skilar sér margfalt til baka.“