Óhætt er að segja að Kristjón Kormákur Guðjónsson, fyrrverandi ritstjóri DV, Hringbrautar og Fréttablaðsins, sé enn gáttaður eftir dularfullar bréfasendingar sem ritstjórn DV barst þann 10. ágúst árið 2017.
Kristjón Kormákur fer yfir málið í Facebook færslu, sem hann nefnir einfaldlega: „UNDARLEG 3 ÁRA ÓLEYST GÁTA.“ Þar birtir hann mynd af innihaldsefni sendingarinnar, en þar má sjá myndir af leikaranum Pierce Brosnan, Donald Trump, Bandaríkjaforseta og Ash Ketchum, aðalpersónu Pókemon.
„Það var nokkuð undarlegt bréfið sem barst inn á ritstjórnarskrifstofu DV þann 10. ágúst 2017. Á þeim árum sem ég starfaði sem ritstjóri barst nokkur fjöldi af furðulegum en skemmtilegum sendingum,“ skrifar Kristjón.
„Þessi gáta er óleyst nú þremur árum síðar en ekki er vitað hver sendandinn var. Við sem störfuðum á ritstjórn DV á þessum tíma náðum að mig minnir aldrei að átta okkur á þessari:
Í brúnu umslagi voru:
31 útprent í afar góðum gæðum af leikaranum Pierce Brosnan
19 útprent Ash og Pikachu
Og síðan voru 9 stykki af Donald Trump,“ skrifar Kristjón og spyr:
„Hver eru skilaboðin?“