Gylfi Þór Þorsteinsson, umsjónarmaður farsóttahúsa á Íslandi, hvetur Íslendinga til að sýna samkennd frekar en dómhörku í faraldrinum. „Hættum að leita að sökudólgum, það er engin sekur. Leitum frekar að lausnum,“ skrifar Gylfi á Facebook síðu sína í dag.
„Við erum ekki í seinni bylgju, við erum að takast á við Covid og við munum halda því áfram í töluverðan tíma.“
Opnun landamæra ekki vandamálið
Hann segir fjölgun smita síðustu daga ekki vera vegna opnun landamæra. „Það er ekki fólki að kenna sem er að leita eftir alþjóðlegri vernd eða ferðamönnum. Ég fæ það fólk í mín hús.“
Sé ferðamaður eða flóttamaður sýktur við landamæri er þeim skylt að sæta einangrun í farsóttahúsi.
Íslendingar bera smit
„Engin flóttamaður hefur borið með sér smit, þeir ferðamenn sem hafa greinst á landamærum hafa ekki komist í samband við Íslendinga.“ Þá man Gylfi aðeins eftir einum ferðamanni sem hefur fengið neikvætt próf á landamærum sem reyndist seinna vera jákvætt.
„Þeir sem hafa borið smit með sér milli landamæra eru Íslendingar, fólk sem vill komast heim. Við erum í baráttu, líklega stærsta stríði sem við höfum tekið þátt í síðan í Þorskastríði. Við sigrum með því að standa saman.“
