Guðni Th. Jóhannesson, forseti Íslands hefur gefið launahækkun sína í hverjum mánuði frá nóvember 2016. Er sú upphæð komin yfir tíu milljónir.
Þegar Kjararáð ákvað að hækka laun æðstu ráðamanna þjóðarinnar í nóvember 2016 vakti það mikla reiði í samfélaginu. Laun þingmanna hækkuðu um tæplega 390 þúsund og ráðherrar um 570 þúsund. Forseti Íslands hækkaði um hálfa milljón. Guðni sagði fljótlega eftir hækkunina:
„Ég bað ekki um þessa kauphækkun og vissi ekki af henni. Ég þarf ekki þessa kauphækkun.“
Þá sagði Guðni að kauphækkunin myndi ekki renna í hans vasa. Ríkisútvarpið greindi frá því í desember 2017 að Guðni hefði gefið tæplega 4 milljónir af launum sínum í góðgerðarmál eða um 300 þúsund mánaðarlega. Nýlega greindi Kjarninn frá því að Guðni hafi sent erindi til fjármálaráðuneytisins þar sem hann óskaði eftir að laun hans yrðu fryst til 2021 en þau áttu að hækka um tæpar 200 þúsund krónur. Við því var orðið.
Í ljósi háværra umræðna um launahækkanir ráðamanna óskaði Fréttablaðið og Hringbraut eftir að vita nú tveimur og hálfu ári síðar hvort Guðni hafi enn þann hátt á að styrkja góð málefni um 300 þúsund um hver mánaðamót. Það fyrirkomulag er óbreytt. Í svari frá forsetaritara segir m.a:
„Þegar kjararáð heitið hækkaði laun forseta umtalsvert haustið 2016 hafði forseti enga vitneskju um að það stæði til. Hann lét þau orð falla þá að hann hefði ekki beðið um þessa hækkun, þyrfti ekki þessa hækkun og mundi því láta hana renna annað. Þetta er óbreytt.“
Ekki kemur fram hvaða samtök njóta gjafmildi forsetans. En sé tekið mið af því að Guðni hafi í desember 2017 verið búinn að gefa tæpar fjórar milljónir í góðgerðarmál, þá ætti sú upphæð að vera rúmar 12 milljónir króna.