Eldgosið er mallandi þarna upp frá. Það rignir smá, en annars hefur enginn farið þarna upp í dag,“ segir Steinar Þór Kristinsson, svæðisstjóri almannavarna um stöðuna á eldgosinu í Meradölum, en lokað hefur verið að gosstöðvunum í allan dag. Fréttablaðið greindi frá.
Hann segir að gærkvöldið hafi að mestu gengið vel. „Í gær gekk bara ótrúlega vel. Það var eitthvað álag þarna hjá okkur seint í gærkvöldi, fólk að mæta sem var orðið lúið,“ segir Steinar, en upp kom í gær að fólk var að mæta með of ung börn sem urðu örmagna á leiðinni.
„Fólk er að mæta með of ung börn, það er það sem við erum að horfa upp á. Við reynum að segja við fólk í hvaða aðstæður það er að fara út í og mæla með að gera það ekki ef það er ekki tilbúið í það. Við getum svo sem ekki bannað fólki að fara, en það tekur yfirleitt vel í það sem við höfum að segja. Það er bara allur gangur á þessu,“ segir Steinar.
Almannavarnadeild ríkislögreglustjóra hefur tekið ákvörðun um að áfram verði lokað inn á gossvæðið að Meradölum og verður staðan endurmetin eftir stöðufund í fyrramálið.
Kemur þetta fram í tilkynningu frá lögreglunni á Suðurnesjum, en í gær var tekin ákvörðun um að gossvæðið yrði lokað klukkan fimm í morgun að sökum veðurs. Veðurstofa hafði lýst yfir gulri viðvörun á svæðinu.
Hægt er að lesa meira hér.
