Trausti Salvar Kristjánsson, Bolvíkingur og fyrrverandi blaðamaður, ritaði færslu á Facebook í gær þar sem hann agnúaðist út í þá þungu umferð sem myndast oft á stofnbrautum Reykjavíkur. Hann fékk aldeilis að kenna á henni í vikunni.
Færsla Trausta hefst svona: „Jæja. Það tók mig heilar 55 mínútur að keyra frá Reykjavíkurflugvelli upp í Nethyl, (Árbær) sem er nokkuð bein og greið leið um Miklubraut og Ártúnsbrekku, alls 7,8 kílómetrar, sem Já.is segir að taki 8 mínútur,“ segir Trausti.
Það var þó ekki það sem fór mest í taugarnar á Trausta: „Á meðan fór farþeginn sem ég keyrði í flug, til Ísafjarðar og keyrði til Bolungarvíkur, á alls 54 mínútum og var því á undan mér á sinn áfangastað, sem er þó rúmlega 400 kílómetra lengri leið. Dásamleg þessi borg alveg hreint...“ segir Trausti kaldhæðnislega. Honum var bersýnilega ekki skemmt.
Vinir Trausta kenna ekki beint í brjóst um hann og gera grín að honum undir færslunni. Þar segir blaðakonan Ragna Gestsdóttir: „Hrikalega keyrir þú hægt……“
Þá segir Grímur Atlason, framkvæmdarstjóri Geðhjálpar: „Munaði mjóu að hann færi vestur, hringsólaði þar í 40 mín, flygi aftur suður, tæki bílaleigubíl, færi Strandirnar, Hestakleifina og Mjóafjörðinn inn og út: 11 til 12 tíma ferðalag - those were the days!“
Þá gerir einn grín að Degi B. Eggertssyni, borgarstjóra, og áformum hans um Borgarlínu: „Áfram Dagur og Bíllausi lífstíllinn Svo reddar Borgarlínan öllu.“
