„Í allri sinni einfeldni ætti að leggja niður þetta embætti í þessari mynd því það er í raun alveg tilgangslaust,“ segir Tómas A. Tómasson, betur þekktur sem Tommi á Búllunni, í pistli á vef Eiríks Jónssonar.
Tommi skrifar þar um hin ýmsu málefni sem eru honum hugleikin og nú veltir hann fyrir sér hlutverki forseta Íslands, en eins og kunnugt er var Guðni Th. Jóhannesson settur í embætti forseta um helgina eftir stórsigur í kosningunum í júnímánuði.
Tómas kveðst vera þeirrar skoðunar að þegar Guðni var kjörinn forseti árið 2016 með 39% atkvæða hefði átt að kjósa aftur milli tveggja efstu frambjóðenda. Telur hann að Halla Tómasdóttir hefði átt góða möguleika á kjöri ef seinni umferð kosninganna hefði farið fram.
En helst af öllu telur Tommi réttast að leggja embættið niður.
„Forsætisráðherra ætti að vera hinn eini og sanni forseti landsins og gegna þessu hlutverki. Flytja á Bessastaði o.s.frv. Út um allan heim eru æðstráðandi fulltrúar síns lands svo afhverju ætti okkar æðstráðandi ekki geta gert það líka,“ spyr Tómas sem segir óþægilegt fyrir forsætisráðherra og ríkisstjórn að þurfa að taka tillit til og vera „í mömmuleik“ við valdalausan forseta sem getur sagt hvað sem er úti í heimi og allsstaðar. „Svo ég tali nú ekki um allar fálkaorðurnar sem hann dreifir ótímabært,“ segir hann.
Tommi stingur upp á því að forseti Hæstaréttar geti gefið sigurvegara þingkosninga tækifæri til að mynda stjórn. „Og ef svo kæmi til þess að Alþingi semdi lög sem þættu umdeilanleg má alltaf kalla eftir þjóðaratkvæðageiðslu ef málið er svo brýnt. Aftur undir handleiðslu forseta Hæstaréttar. En þetta er nú bara mín skoðun,“ segir Tommi að lokum.
Pistilinn má lesa í heild sinni hér.
