„Væri ekki gott ef mannskepnan hætti að hugsa um framfarir og gróða og mundi snúa sér að því að elska náungann. Ást og kærleikur er það sem skiptir máli,“ segir Tómas Tómasson, oft kallaður Tommi á Búllunni.
Tómas er pistlahöfundur á vef Eiríks Jónssonar og í nýjasta pistli sínum skrifar hann meðal annars um græðgina.
„Stundum velti ég því fyrir mér til hvers allar þessar nýju tækniuppfinningar og framfarir í heiminum eru í raun. Hversu bættari er mannkynið? Í dag eru allskyns hlutir sem við notum daglega og finnst við ekki geta verið án og við spyrjum: Hvernig fórum við að áður fyrr?“
Tommi bendir á að við séum nokkuð ánægð með hlutina eins og þeir eru í dag – fyrir utan COVID-19 vitanlega. „Höfum í raun allt til alls en eftir 5 eða 10 ár þá verða komnir hlutir sem við teljum ómissandi og munum spyrja enn og aftur: Hvernig fórum við að?“
Tommi segir að við þurfum ekkert meira en við höfum. „Ef við lítum á mannkynssöguna og sjáum hvað mannskepnan hefur áorkað án allrar þessarar tækni sem við í dag prísum út í eitt þá hafa nú aldeilis verið gerðir ótrúlegustu hlutir án nútímatækni og vísinda,“ segir hann og spyr hvort það væri ekki gott ef mannskepnan hætti að hugsa um gróða.
„Jú, auðvitað er gott að þróa heilbrigðiskerfið og efla læknavísindin en hvað þurfum við svo sem meir. Við höfum allt til alls,“ segir Tommi og bætir við að dauðasyndirnar sjö séu að drepa okkur: Hroki, öfund, reiði, leti, óhóf, losti og græðgi. Tommi segir að það mætti vel bæta við tveimur syndum á þennan lista: Sjálfselsku og óheiðarleika.
„Ef mannskepnan myndi bara einblína á að uppræta þessa vágesti og einblína á dyggðirnar 7 væri hægt að uppræta hungur og vosbúð í heiminum,“ segir hann og bætir við að því miður sé þetta óskhyggja sem sennilega mun aldrei verða að veruleika.
„En ef allir gerðu hreint fyrir sínum dyrum og hugsuðu ekki um hvað aðrir eru að gera þá væri þetta hægt. En því miður þá er þetta ekki svo einfalt því ef það er til himnaríki þá er til helvíti og þegar upp er staðið þá eru dauðasyndirnar 9 ekkert á leiðinni að gefast upp.“