Anna Dóra Sæþórsdóttir, forseti Ferðafélags Íslands, ætlar að segja af sér formennskunni. Hún greindi frá þessu í dag og sagði ástæðuna vera að í félaginu ráði stjórnarhættir ríkjum sem fari þvert gegn hennar eigin gildum. Hún telur að stjórn félagsins hafi ekki brugðist vel við málum er varða meðal annars brot á siðareglum félagsins, ásakanir um áreitni og gróft kynferðislegt ofbeldi.
Anna tók við sem formaður í fyrra fyrst kvenna en hún segir að eftir kjör hennar hafi hún tekið eftir ýmsum málum hefði verið stungið undir stól hvort sem það voru ásakanir um kynferðislegt ofbeldi og áreiti eða athugasemdir um rekstur félagsins.
Á þeim tíma sem Anna tók við sem formaður sat Helgi Jóhannesson, fyrrverandi yfirlögfræðingur Landsvirkjunar, í stjórn félagsins. Önnu hafi borist ábending um kynferðislegt ofbeldi sem hann hafði gerst uppvís um og olli því að hann lauk störfum hjá Landsvirkjun.
Þá sakar Tómas Guðbjartsson skurðlækni og stjórnarmann í ferðafélaginu um að hafa barist fyrir endurskipun Helga.
„Einn af þessum stjórnarmönnum, sem er góðvinur þessa fyrrverandi stjórnarmanns, hefur beitt sér af hörku fyrir því að stjórnarmaðurinn fyrrverandi fái aftur að starfa fyrir hönd félagsins, þrátt fyrir að engin málefnaleg eða viðskiptaleg rök séu fyrir því. Sá sem sagði af sér hefur enga sérhæfða þekkingu til starfa innan félagsins, sem fjöldi annarra getur ekki innt jafnvel af hendi,“ segir í færslu Önnu en samkvæmt Visi er hún þar að ræða um Tómas Guðbjartsson.
„Ávinningur af slíkri ráðstöfun væri því enginn fyrir Ferðafélagið en myndi hins vegar valda félaginu orðsporsáhættu og mögulega aftra fólki frá þátttöku í ferðum félagsins, auk hættunnar á því að fyrri hegðun myndi endurtaka sig og aðrar konur yrðu fyrir áreitni. Helstu rökin sem notuð voru til að réttlæta endurkomu umrædds fyrrverandi stjórnarmanns voru að hann væri „vinur okkar“ og að „við skulduðum honum“.
Tómas hefur nú svarað Önnu.
„Að gefnu tilefni þarf ég að leiðrétta alvarlegar ásakanir í minn garð sem tengjast afsögn fyrrverandi forseta Ferðafélags Íslands, Önnu Dóru Sæþórsdóttur. Ég hef aldrei lagt til að fyrrum stjórnarmaður tæki aftur sæti í stjórn félagsins, eða krafist þess að hann komi aftur til starfa fyrir félagið. Hann hefur heldur ekki krafist þess og var nýr stjórnarmaður kosinn í hans stað á síðasta aðalfundi félagsins,“ skrifar Tómas.
„Sami aðili hafði hins vegar sent stjórn félagsins erindi sl. vor þar sem hann óskaði eftir að fá að útskýra sína hlið á skyndilegu brotthvarfi úr stjórn í nóvember 2021. Taldi ég á stjórnarfundi rétt að erindið fengi formlega umfjöllun stjórnar, sem forseti taldi ekki ástæðu til, en mér falið að koma á óformlegum fundi sem forseti hugðist ekki sækja. Viðskilnaður forseta við stjórn og framkvæmdastjóra Ferðafélags Íslands er sorglegt mál, ekki síst fyrir Ferðafélag Íslands, þar sem staðreyndum er snúið á hvolf og umræðan færð frá þeim alvarlega samskiptavanda sem litað hefur starf stjórnar sl. ár,“ skrifar Tómas að lokum.
