„Jón Steinar Gunnlaugsson sendir mér og fleiri kollegum mínum á Landspítala súra pillu á heimasíðu sinni í pistli sem hann kallar Frelsi í stað valdbeitingar,“ skrifar læknirinn Tómas Guðbjartsson á Facebook síðu sinni.
„Þar segir: "Látum ekki einsýna lækna villa okkur sýn. Kannski eru þeir bara að búa til stöðu sem þeir telja að þrýsti á um hærri framlög úr ríkissjóði (les: frá skattgreiðendum) til Landspítalans?" Þessi orð hans eru bæði órökstudd og lágkúruleg - og ótrúlegt að þarna haldi á penna fyrrverandi hæstaréttardómari.“
Tómas segir það rétt að honum hefur ekki hugnast að aflétta sóttvarnartakmörkunum hratt eða í einum rykk.
„Þar skiptir fleira máli en fjöldi Covid-innlagna, t.d. að starfsfólk sýkist ekki í veldisvexti þannig að starfsemi sjúkrahússins lamist á nokkrum dögum. Við sjáum vel á Evrópumótinu í handbolta hversu smitandi omicron er, en með slíka sýkingu mætir enginn til vinnu á sjúkrahúsi,“ skrifar Tómas.
„Ný gögn sýna þó sannarlega að Landspítalinn er að komast fyrir vind í þessari síðustu bylgju - og álagið á deildum, og þá sérstaklega gjörgæslunum, skánar dag frá degi. Ekki má þó gleymast að enn greinast hátt í 50 einstaklingar á dag með delta-afbrigðið - og margir - m.a. fjölskyldumeðlimir mínir og vinir - eru talsvert veikir af omicron - þótt ekki hafi þeir þurft innlögn eða gjörgæslu,“ bætir hann við.
Tómast segir að enn eru á gjörgæsludeildum lífshættulega veikir Covid-sjúklingar og stór hluti helgarvaktarinnar farið í að sinna þeim.
„Afléttingar sóttvarna eru því sem betur fer í kortunum - en þær verður að taka í skynsömum og ópólitískum skrefum. Ég er nefnilega hjartanlega ósammála hæstaréttardómaranum fyrrverandi að sóttvarnir gegn Covid séu "móðursýki" og "sósíalismi". Þar hef ég ekki síst í huga heilsu þeirra fjölmörgu ónæmisbældu einstaklinga sem búa í okkar ágæta samfélagi - og eiga undir högg að sækja - en jafnvel omicron getur gert þeim alvarlega skráveifu.“
Tómas segir að ýta þeim til hliðar og leggja í lífshættu er algjörlega óásættanlegt.
„Að halda síðan fram að mér eða kollegum mínum gangi eitthvað annað til en gæta hagsmuna sjúklinga okkar og samfélagsins alls - er vítaskot sem ratar beint upp í stúku,“ skrifar Tómast að lokum.