Tómas Guðbjartsson, lungnaskurðlæknir er afar ósáttur með að búið sé að selja Hjörleifshöfða til Þjóðverja sem ætla að hefja þar námuvinnslu.
„Hvílík hneisa að selja þessa náttúruperlu sem Hjörleifshöfði er - og það fyrir námavinnslu á vikri!. Eru menn blindir? Þetta er stórkostlegur staður með hellum og klettum og langt frá því að vera "svartur sandur". Efst er falleg grasþekja og mikið fuglalíf,“ skrifar Tómas á Facebook síðu sinni.
„Útsýni til Mýrdalsjökuls er mergjað, einnig út eftir Kötlutanga þar sem náman verður. Þarna kom jú fóstbróðir Ingólfs Arnarssonar, Hjörleifur Hróðmarsson og var veginn af írskum þrælum sem Ingólfur elti uppi og drap. Höfðinn er því stórmerkilegur fyrir sögu okkar Íslendinga. Ekki segja mér að það vanti námavinnslu á svæðið - enda Vík í Mýrdal þegar orðið eitt helsta ferðamannasvæði landsins með stórkostlegri strönd og heimsfrægum Reynisdröngum,“ skrifar hann enn fremur.
Hann skilur ekkert í að þetta sé leyft og segir að með þessu sé verið að slátra mjólkurkúnni sem er ferðamannaiðnaður ásamt því að þetta sé slæmt fyrir náttúruvernd.
„Námavinnsla í næsta nágrenni á enga samleið með öflugum ferðamannaiðnaði. Það er eins og að slátra mjólkurkúnni en er auk þess út frá sjónarmiði náttúruverndar og sagnfræði algjör tímaskekkja,“ skrifar Tómas að lokum.
Heimaskítsmát í Mýrdal Hvílík hneisa að selja þessa náttúruperlu sem Hjörleifshöfði er - og það fyrir námavinnslu á...
Posted by Tomas Gudbjartsson on Mánudagur, 30. nóvember 2020