Tómas Guðbjartsson læknir tekur upp hanskann fyrir hjúkrunarfræðinga og segir að þeir séu tvímælalaust hetjurnar í Covid-19 faraldrinum sem nú geisar. Hann bendir á að þeir séu í mestri snertingu við sjúklingana og þá sé hann ekki að gera lítið úr hlutverki annarra.
Eins og greint var frá í gær máttu hjúkrunarfræðingar þola tekjuskerðingu nú um mánaðamótin. Einn þessara hjúkrunarfræðinga, Sóley Halldórsdóttir, skrifaði færslu á Facebook sem vakið hefur mikla athygli en í hennar tilfelli lækkuðu launin um 41 þúsund krónur. Sóley vinnur á gjörgæsludeild Landspítalans í Fossvogi þar sem mikið álag hefur verið vegna Covid-19.
Tómas segir að hetjurnar okkar, hjúkrunarfræðingarnir, séu aftur samningslausir eftir árs samningaviðræður.
„Til að bæta gráu ofan á svart voru laun þeirra skert rétt áður en Covid-faraldurinn skall á - og það til að ná auknum sparnaði á LSH. Þetta gerist á vakt VG sem reifir sögðust ætla að styðja sérstaklega við kvennastéttir í þessari ríkisstjórn. Það er eitthvað mikið rangt við þetta allt saman - ekki síst núna þegar þessi hámenntaða stétt - sem bókstaflega hættir lífi sinu til að bjarga öðrum - skuli endurtekið fá svona kaldar tuskur í andlitið,“ segir Tómas sem bætir við að Covid-19 faraldurinn muni ekki vinnast án aðkomu hjúkrunarfræðinga.
„Erlendis er verið að borga sömu hjúkrunarfræðingum ríflega bónusa - enda verður þessi faraldur ekki unninn án þeirra. Koma svo - og ekki segja mér að ómögulegt sé að semja vegna launaskriðs á almennum vinnumarkaði. Það er gömul lumma og þreytt. Allir sjá núna - og hefðu betur séð fyrr - hversu mikilvægt hlutverk þeirra er. Samfélög fungera ekki án heilbrigðiskerfis og þar eru hjúkrunarfræðingar risastórt og ómissandi tannhjól,“ segir Tómas í færslu á Facebook.
