„Það er enginn sem sérstaklega óskar eftir því að annast sýkta Covid-19 sjúklinga, sjúkdóm sem þú getur fengið sjálfur og verið banvænn,“ segir Tómas Guðbjartsson læknir í pistli á Facebook-síðu sinni.
Í pistlinum segir hann að ýmis líkindi séu með slysinu í Tsjernobyl árið 1986 og Covid-19 faraldrinum sem nú geisar, enda sé óvinurinn ósýnilegur í báðum tilvikum.
„Í Tsjernobyl var fjöldi manna sendur inn í brennandi kjarnorkuverið til að sprauta á rústirnar vatni og minnka þannig geislunina. Þeir fengu nafnið "Chernobyl liquidizers" og létust margir þeirra úr geislun og afleiðingum hennar. Síðar voru þessir einstaklingar gerðir að þjóðhetjum og fjölskyldur þeirra fengu bætur - enda talið að aðgerðirnar hafi bjargað óteljandi mannslífum um gjörvalla Evrópu.“
Tómas bendir á að fáir beinlínis óski eftir því að annast Covid-19 sjúklinga en er heilbrigðisstarfsfólk í mikilli hættu á að fá sjúkdóminn. Bendir Tómas á að á Ítalíu séu 9% smitaðra heilbrigðisstarfsmenn.
„En þetta gerum við samt - enda engir aðrir betur til þess fallnir og starfið hugsjón. Þetta á ekki síst við um stærsta hópinn, hjúkrunarfræðingana, sem eru öðrum fremur "slökkviliðsmenn" (liquidizer) Covid-19 faraldursins. Það er með ólíkindum að stjórnvöld ætli að láta það viðgangast að skerða laun þeirra í þessu ástandi. Og það í miðju slökkvistarfi - þegar eldurinn hefur ekki einu sinni náð hámarki,“ segir Tómas sem vandar yfirvöldum ekki kveðjurnar.
„Hvílíkur roluháttur sem truflar allt hugsandi fólk. Best væri að semja strax en þangað til verður að aflétta þessum óskiljanlega og hallærislega sparnaði - og í staðinn borga þeim og öðrum í framlínunni launabætur fyrir álagið. Þær/þeir eiga skilið virðingu og alls ekki sjálfgefið að fórna eigin heilsu fyrir hugsjónina eina saman.“
