Tómas Guðbjartsson hjartaskurðlæknir er fjölhæfur með eindæmum og sýndi það sig um helgina þegar hann bjargaði lífi lambhrúts í Arnarfirði.
Tómas segir frá þessu á Facebook-síðu sinni þar sem hann birtir myndir af björgunaraðgerðunum.
Frændi Tómasar, Víðir Hólm Guðbjartsson, er bóndi í Grænuhlíð í Arnarfirði. Lambið lenti í ógöngum í sauðburði á dögunum þegar höfuð þess klemmdist í troðningi í stíunni og neðri vörin rifnaði illa inn að kjálka. Sýking og síðar stórt drep komst í sárið þannig að lambið vildi ekki nærast.
„Var frændi farinn að spá í að aflífa þann litla - en fannst hann samt ekki alveg tilbúinn að mæta skaparanum. Enda með fallegri lömbum og augnasvipurinn einstakur.“
Tómas segir að eftir samráð við dýralækni hafi þeir fundið verkja- og slævilyf sem þeir gáfu í vöðva ásamt penisillíni.
„Síðan var drepið skorið af og notaðist ég við græjur úr fjallaskíða-sjúkrakassanum, m.a. grisjur til að stöðva blæðingu. Víðir frændi lék monitor og hlustaði eftir hjartslætti og öndun á nýstárlega hátt. Hrúturinn ungi, sem eftir aðgerðina fékk nafnið Tommi, varð eldhress á 10 mínútum og fór strax að drekka hjá mömmu sinni - sem virtist sátt við aðgerðina. Tala um fast-track surgery - og gera gagn í helgarfríi.“
Fleiri myndir má sjá í færslu Tómasar hér að neðan.
Tommi opererar hrútinn Tomma Í sauðburði hjá Víði frænda í Grænuhlíð í Arnarfirði var ég kynntur fyrir nokkurra daga...
Posted by Tomas Gudbjartsson on Sunnudagur, 24. maí 2020