„Helgin hefur verið afar annasöm á gjörgæsludeildum Landspítala. Í kvöld náði ég þessu skemmtilega skoti á milli stríða - í gegnum öryggisrúðu á gjörgæsludeildinni við Hringbraut.“
Þetta sagði Tómas Guðbjartsson læknir á Facebook-síðu sinni í gærkvöldi. Þar birti hann mynda af fjórum hjúkrunarfræðingum á Covid-stofunni sem minntu einna helst á geimfara á leið til tungslins. Myndina má sjá í færslu Tómasar hér að neðan og útskýrir hann myndina í nokkrum orðum.
„Vírnetið í öryggisrúðunni tengir mig hins vegar við rimla í fangelsi - enda taka hjúkrunarfræðingarnir okkar 3-4 klst. tarnir þarna inni, tvisvar á vakt, án þess að nærast eða komast á klósett. Það er einfaldlega gert til að minnka smithættu og þurfa ekki að skipta um hlífðarföt að óþörfu. Það vantar samt ekki gleðina og þær gerðu alls kyns kúnstir fyrir mig og myndavélina sem ekki þolir birtingu. Mér finnst ég ná að fanga stemmninguna í öllu annríkinu en það var vinur minn RAX sem á heiðurinn að myndvinnslunni, þ.e. gera "rimlana" skýrari. Því eins og þið sjáið þurfa þessar stórglæsilegu konur enga fótósjoppun!“
Innilokaðir geimfarar á gjörgæslu. Helgin hefur verið afar annasöm á gjörgæsludeildum Landspítala. Í kvöld náði ég þessu...
Posted by Tomas Gudbjartsson on Sunnudagur, 5. apríl 2020