Bandaríski Óskarsverðlaunaleikarinn Tom Hanks er búinn að ná sér að fullu eftir að hafa greinst með COVID-19 í mars síðastliðnum.
Tom og eiginkona hans, leikkonan Rita Wilson, veiktust bæði en þau eru orðin frísk og glíma ekki við nein eftirköst smitsins eins og mörg dæmi hafa verið um. Tom og Rita voru meðal þeirra fyrstu til að veikjast af veirunni, en það gerðist þegar þau voru við vinnu í Ástralíu.
Hjónin greindust jákvæð þann 10. mars síðastliðinn og dvöldu þau á sjúkrahúsi í þrjá sólarhringa til öryggis.
Í viðtali við Guardian furðar Hanks sig á því hversu ólík áhrif veiran hafði á þau hjónin. Hanks segir að Rita hafi misst allt lyktar- og bragðskyn, hafi upplifað ógleði og fengið mjög háan hita. Veiran hafði hins vegar allt önnur áhrif á Hanks.
„Ég var bara að drepast í líkamanum, var mjög þreyttur og átti erfitt með að einbeita mér,“ segir Hanks sem segir að þetta hafi verið dálítið skrýtið.
Veiran leggst misjafnlega þungt á fólk og eru dæmi um einstaklinga sem hafa varla fengið nein einkenni á meðan aðrir, jafnvel heilsuhraustir einstaklingar, hafa þurft að fara í öndunarvél. Þá eru mýmörg dæmi um almennt heilsuhrausta einstaklinga sem hafa tapað baráttu sinni við veiruna eða fylgifiska hennar.
Sjálfur segist Hanks vissulega hafa haft áhyggjur þegar hann greindist jákvæður.