Víðir Reynisson, yfirlögregluþjónn hjá Almannavarnadeild ríkislögreglustjóra, segir mikilvægt að landsmenn vandi sig þegar kemur að baráttunni við faraldurinn en hann ítrekaði að persónubundnar sóttvarnir skiptu öllu máli þegar kemur að forvörnum gegn veirunni.
Alls eru 114 nú í einangrun með virkt kórónaveirusmit en tvö innanlandssmit greindust í gær auk tveggja við landamærin. Þá var greint frá því fyrr í dag að einstaklingur á tvítugsaldri hafi verið lagður inn á spítala og eru því þrír inniliggjandi á spítala, þar af einn á gjörgæslu.
„Því miður þá er unga fólkið að veikjast og það getur líka veikst illa þannig að við þurfum að vanda okkur og fara varlega aftur,“ sagði Víðir á upplýsingafundi dagsins.
Hann segir mikilvægt að þeir sem finna fyrir einkennum eða eru veikir séu í einangrun og tali við sína heilsugæslustöð upp á leiðbeiningar um sýnatöku. Þá sé mikilvægt að fólk sé áfram í einangrun meðan það bíður eftir niðurstöðu.
„Við erum að læra á þetta kerfi, við töluðum um ýmislegt sem fór ekki nógu vel um síðustu helgi, við erum að læra, menn gera mistök og það mikilvægasta sem er að menn læra af þeim og gerir betur,“ sagði Víðir.
„Tölum saman, vinnum saman, leysum þetta saman og þá eru okkur allir vegir færir.“