„Það segir sig sjálft að einhver þarf að stíga til hliðar, annað hvort hann eða allir lögreglustjórar og lögreglumenn á Íslandi. Mér finnst þetta reiknidæmi frekar einfalt ef ég á að segja eins og er,“ segir Helga Vala Helgadóttir, þingmaður Samfylkingarinnar.
Líkt og áður hefur komið fram í fréttum hafa 8 af 9 lögreglustjórum landsins lýst yfir vantrausti á ríkislögreglustjóra.
Áslaug Arna Sigurbjörnsdóttir, dómsmálaráðherra hefur ekki viljað tjá sig um það hvort Haraldur Johannessen, ríkislögreglustjóri njóti trausts en sagði hún eftir fund sinn með stjórnskipunar- og eftirlitsnefnd í morgun að verið væri að skoða öll málin í heild sinni í ráðuneytinu.
„Það er verið að vinna góða vinnu og mikið af góðu fólki sem er að sinna því,“ sagði Áslaug í morgun. Í kvöldfréttum RÚV í gærkvöldi sagði Áslaug að embættismenn nytu ríkrar réttarverndar: „ Þegar starfsmenn bregðast skyldum er hægt að setja ákveðna atburðarás á stað og sú vinna er í gangi,“ greindi Áslaug frá. Eftir fundinn í morgun dró Áslaug þó aðeins úr orðum sínum og sagðist hafa verið að vísa til alls málsins og mál lögreglunnar í heild sinni.
Síðan Haraldur kom fram í viðtali í Morgunblaðinu virðist þverpólitísk samstaða ríkja um að Harald verði að víkja úr starfi.
Páll Magnússon formaður allsherjarnefndar sagði í Morgunútvarpi Rásar 2 að óboðlegt væri að ríkislögreglustjóri skuli gefa það til kynna í viðtali að hann lumi á vitneskju um spillingu innan lögreglunnar án þess að ætla að opinbera hana. Þá telur hann Harald ekki geta setið áfram í starfi sínu.