„Það er mikil skammsýni að banna opinberum starfsmönnum að segja sannleikann! Frelsum þá sem hafa lokast inni í skáp ævilangrar hræsni!,“ segir Þráinn Bertelsson, rithöfundur og fyrrverandi þingmaður.
Þráinn vísar á Facebook í mál lögreglukonunnar sem mynduð var með merki Vínlandsfánans á búningnum sínum. Málið vakti mikla athygli og var lögreglan gagnrýnd harðlega.
„Eftir því sem ég hugsa meira um þetta mál með löggukonuna sem þótti flott að hafa fasistamerki á einkennisbúningnum sínum en sagðist samt ekki vita hvað þau þýddu - þá hef ég algjörlega skipt um skoðun í málinu og styð rétt lögreglumanna til að merkja sig og búninga sína í bak og fyrir til að tjá skoðanir sínar og sinn innri mann,“ segir Þráinn hæðnislega í pistli sínum.
Hann segir að það sama ætti auðvitað að gilda um aðra ríkisstarfsmenn.
„Dómurum og starfsfólki dómskerfisins ætti jafnvel að vera skylt að merkja vinnufötin sín með auglýsingum, jafnvel slagorðum þess stjórnmálaflokks eða stefnu sem á hug þeirra og hjarta - og jafnvel bera merki þeirra banka eða fyrirtækja sem þeir eiga flest hlutabréf í.
Allir forstöðumenn ríkisstofnana ættu í nafni gegnsæis og hreinskilni að merkja sig með táknum sem í þeirra tilviki merkja vernd og samstöðu,“ segir hann og bætir við að það sama ætti að eiga við um þingmenn.
„Alþingismenn eru þegar merktir þeim stjórnmálaflokkum sem þeir sitja á þingi fyrir, en þeir þyrftu líka að einkenna sig með því að bera auglýsingar eða lógó frá helstu stuðningsaðilum sínum og hollvinum. Með öðrum orðum þá væri dásamlegt ef hlutleysishræsnin væri aflögð og hreinskilnin kæmi í staðinn. Ævilöng bæling og heft tjáning gerir engan að betri manni,“ segir Þráinn sem endar pistil sinn á þessum orðum:
„Hreinsum nú andrúmsloftið og heimilum bældum ríkisstarfsmönnum loksins að opinbera hvað það er sem í raun og veru gefur lífi þeirra gildi, hvort sem það er bláa línan, bláa höndin eða rómantískur sjóræningafáni.
Tilgangurinn með málfrelsi og tjáningarfrelsi er sá að fólk geti sagt satt og þurfi ekki að vera lokað inni í skáp í ævilöngum þykjustuleik því að SANNLEIKURINN MUN GERA OKKUR FRJÁLS - ef eitthvað er að marka Heilaga ritningu.“