Þórólfur Guðnason, sóttvarnalæknir, segir það nú vera að gerast oftar og oftar að fólk smitist aftur af kórónuveirunni. Dæmi eru um að fólk sem hafi jafnvel smitast tvisvar áður, smitist nú í þriðja skiptið með veiruna.Fréttablaðið fjallar um málið.
„Við sjáum að sérstaklega þeir sem smituðust í fyrsta sinn á árinu 2020 og 2021 þeir eru meira að endursmitast núna, það er allt upp í 20 prósent af þeim sem fara í opinber próf, sérstaklega núna upp á síðkastið.“
Þórólfur nefnir tvær mögulegar ástæður fyrir því að nú séu svona margir að smitast.
„Það getur bæði verið það að þessi afbrigði sem voru í gangi í fyrstu bylgju faraldursins veiti ekki alveg nægilega góða vernd gagnvart þessum nýju afbrigðum og svo líka hitt að það er liðinn meiri tími og við vitum að með tímanum dvínar ónæmið og kannski er það samblanda af þessu sem veldur þessu.“
Þórólfur segir þó að endursmitin seú ekki eins alvarleg og fyrri smit, þannig að eftir því sem fólk smitast oftar ættu einkennin að vera vægari.
„Þannig að kannski mun fólk sem smitast aftur fá vægari kvefeinkenni. Það er hugsanlegt,“ segir Þórólfur. Hann segist þó vera slakur yfir nýjustu vendingum í faraldrinum, en þó á varðbergi.
„Spurningin er svo hvort það muni koma fram ný afbrigði sem verða allt öðruvísi, mér finnst það mjög ólíklegt en við þurfum að vera á verði.“
Fréttablaðið fjallar nánar um málið, en hægt er að lesa um það hér.