Þórólfur Guðnason sóttvarnarlæknir ætlar ekki á Þjóðhátíð í Vestmannaeyjum í ár. Þórólfur, sem kemur frá Vestmannaeyjum, segir í samtali við Fréttablaðið að hann hafi ekki farið undanfarin ár og árið í ár verði ekki undantekning. „Ég hef ekki mætt í nokkur ár og fer ekki í ár,“ sagði hann.
Aðspurður út í stærstu útihátíðir landsins sem verða haldnar um Verslunarmannahelgina, líkt og Þjóðhátíð í Eyjum, segir Þórólfur að smithættan sé meiri í slíkum aðstæðum. „Við getum sagt að smithættan er meiri á svona stórum útihátíðum þar sem fólk er í allskonar ásigukomulagi og kannski ekki að passa sig í smitvörnum,“ sagði hann.
Ríkisstjórnin fundar í dag um minnisblað sóttvarnarlæknis. Þórólfur segir flesta af þeim sem greinast vera bólusettir. Vitað var að bólusettir geta enn tekið veiruna. „Menn geta litið á þetta út frá mörgum vinklum. Ég hef margoft bent á það að það virðist vera að vegna Delta afbrigðisins séu bólusetningar ekki eins virkar eins og gegn öðrum afbriðgum,“ segir hann.