Þórir Barðdal, listamaður og stofnandi Lótushússins, er látinn. Þórir lést á líknardeild Landspítalans í Kópavogi þann 14. október síðastliðinn á 62. aldursári. Greint er frá andláti hans í Morgunblaðinu í dag.
Þórir var lærður myndhöggvari og starfaði hann við höggmyndalist í Bandaríkjunum og Portúgal eftir nám. Hann flutti til Íslands 1996 og starfaði meðal annars við höggmyndalist og legsteinagerð. Hann stofnaði steinsmiðjuna Sólsteina og síðar Steinsmiðju Akureyrar.
Þórir kvæntist Sigrúnu Olsen myndlistarkonu árið 1989, en hún lést árið 2018. Í minningarorðum í Morgunblaðinu er bent á að þau hjónin hafi unnið náið saman að andlegum hugðarefnum sínum. Þau stofnuðu til dæmis Lótushúsið, hugleiðsluskóla sem er mörgum Íslendingum að góðu kunnur.