Þorgerður Katrín Gunnarsdóttir, formaður Viðreisnar, var gestur Sigmundar Ernis Rúnarssonar í þættinum Mannamál á Hringbraut í gærkvöldi. Í viðtalinu var farið um víðan völl og ræddi Þorgerður meðal annars um einkalífið og pólitíkina.
Þorgerður, sem sat um árabil á þingi fyrir Sjálfstæðisflokkinn, var varaformaður flokksins og ráðherra um margra ára skeið, ákvað að hætta í stjórnmálum árið 2012 en árið 2016 tilkynnti hún að hún ætlaði að ganga í raðir Viðreisnar.
Í viðtalinu var hún meðal annars spurð hversu sárt það hafi verið þegar hún ákvað að yfirgefa Sjálfstæðisflokkinn, flokkinn sem hún hafði stutt frá blautu barnsbeini.
„Þetta var risa ákvörðun. Við fórum þarna saman út ég og Þorsteinn Pálsson, sá einstaki maður. Þetta var sár ákvörðun, já, að einhverju leyti. En eigum við ekki að segja að flokkurinn hafi auðveldað okkur ákvörðunina,“ sagði Þorgerður sem bætti við að leynt og ljóst hefði verið reynt að ýta fólkinu út sem vildi til dæmis leggja áherslu á Evrópumálin, klára aðildarumsókn að Evrópusambandinu og leyfa almenningi að kjósa um aðild.
„Það var verið að loka okkur úti. Við máttum ekki ræða ákveðnar breytingar á sjávarútveginum, eðlilegt og sanngjarnt gjald að aðganginum fiskveiðiauðlindinni, ákveðnar breytingar í landbúnaðarmálum. Ungir sjálfstæðismenn voru oftar en ekki sammála því sem maður var að segja að að sannkeppnislög þyrftu að gilda um alla. Þýðir það að við séum að grafa undan landbúnaðinum? Nei, við viljum styrkja hann og efla.“
Sem fyrr segir hafði Þorgerður fylgt Sjálfstæðisflokknum um áratugaskeið. En breyttist flokkurinn?
„Já, hann var að breytast. Eigum við ekki að segja að það séu ákveðin öfl sem hafa í gegnum tíðina togað misfast í strengina og þau voru byrjuð að toga fastar,“ sagði Þorgerður sem sagðist þó ekki ætla að eyða lífi sínu í að tala um Sjálfstæðisflokkinn. Það voru góðir tímar sem ég átti en líka mjög erfiðir.“
Hér má sjá viðtalið við Þorgerði Katrínu í heild sinni.
