Þórdís Kolbrún R. Gylfadóttir, ferðamálaráðherra vill að hætt verði að líta til fjölda smita af COVID-19 hjá nágrannaríkjum og að viðmiðunum verði breytt samhliða bólusetningu þegar lönd verða flokkuð í rauð, appelsínugul eða græn.
Þórdís segir í samtali við Ríkisútvarpið að markmið aðgerðanna hafi verið að tempra smit þangað til í ljós komi hvort þeir sem hafi smitast veikist alvarlega. Hún bendir á að sem stendur séu nær allir sem greinast með COVID-19 með lítil eða engin einkenni.
Eins og vitað er stefnir allt í að Ísland verði rautt á lista sóttvarnarstofnunar Evrópu. Þórdís viðurkennir að það séu slæm tíðindi fyrir ferðaþjónustuna hér á landi.
„Þær vísbendingar sem við höfum annars staðar frá er að bólusetningin sé algjör bylting í því hvernig staða Covid er og verður. Þannig að sú vinna sem hafin er um hvað það þýðir að vera orðin fullbólusett, hvernig við ætlum raunverulega að lifa með þessari veiru til framtíðar, hún skiptir miklu máli. Þannig að við vorum þarna með tillögu sóttvarnalæknis að kaupa okkur tíma,“ segir Þórdís.
„Þegar að lönd eru mörg hver langt komin í bólusetningu en önnur auðvitað alls ekki, að þá vona ég að mælikvarðar annars staðar breytist á hvað það þýðir að vera rautt land. Við erum að skima mjög mikið, einna mest allra landa. Við erum líklega eina landið sem er með smitrakningu eins og hér er og það hefur þau áhrif að við erum rauð. Vonandi verður það svo þannig að það þýðir eitthvað annað, ef við horfum á annað heldur en fjölda smita.“
