Þórdís Björk Sigurþórsdóttir, íbúi í Hafnarfirði og viðskiptafræðingur, hefur ítrekað talað gegn bóluefnum og sóttvarnaaðgerðum til að bregðast við heimsfaraldri COVID-19 en hún komst meðal annars í fréttirnar síðastliðinn nóvember þegar hún gagnrýndi lögreglu fyrir meintar gluggagægjur.
Hún heldur nú úti blog síðu þar sem hún kemur sínum skoðunum á framfæri en í nýjustu færslunni, sem birt var í gær, greinir hún frá því að hún hafi fengið boð í bólusetningu með bóluefni AstraZeneca, sem er ætlað starfsmönnum hjúkrunar- og dvalarheimila.
„Skil ekki hvers vegna hann er að senda mér þetta. Hef þó nokkrum sinnum skrifað honum og mótmælt hinu og þessu í sambandi við þessa alþjóðlegu tilraunastarfsemi lyfjafyrirtækjanna með ófullprófuð lyf. Samt sendir hann mér strikamerki og skipar manni að mæta í stuttermabol í bólusetningu,“ skrifar Þórdís.
„Ekki nóg með það, heldur sendi hann manninum mínum þetta líka, sem sagt mitt boð. Í símann hans. Þarf hann að láta marga vita? Kannski komið út um allan bæ!“
Hún vísar til þess að bóluefni AstraZeneca er þróað út frá adenoveiru úr simpönsum, þar sem veira sem smitar vanalegast aðeins simpansa er tekin og erfðabreytt til að draga úr sjúkdómum hjá mannfólki en veiran hefur í gegnum tíðina verið notuð við þróun bóluefna af ýmsu tagi.
„Þar að auki er þetta bóluefni sem inniheldur Simpansaveiru, og eitthvað erfðabreytt efni úr fóstri,“ segir Þórdís og vísaði þar einnig til þess að bóluefni hafi í gegnum tíðina verið þróuð út frá erfðabreyttum frumum úr fóstrum.
„Sama og þegið,“ segir Þórdís einfaldlega.
Bóluefni AstraZeneca fékk skilyrt markaðsleyfi hér á landi í lok janúar eftir að Lyfjastofnun Evrópu mælti með bóluefninu.