„Ég hef séð þá ómældu kosti sem þingmenn flokksins eru búnir, öll sem eitt, dugleg og samviskusöm, hugsjónarík og hvöss þó að ég deili ekki alveg öllu í sýn þeirra.“
Þetta segir Guðmundur Andri Thorsson, þingmaður Samfylkingarinnar, á Facebook-síðu sinni. Tilefnið er nýr Þjóðarpúls Gallup en í honum fer fylgi Pírata upp um þrjú prósent og á meðan fylgi VG fer niður um þrjú prósent. Guðmundur Andri segir að hvorugt komi honum á óvart.
Guðmundur Andri segir að hann færi aldrei að kalla sig Pírata, ekki laumupírata og hvað þá heiðurspírata, en það breyti ekki þeirri staðreynd að þingmenn flokksins séu búnir ómældum kostum eins og rakið er hér að framan.
Þá segist Guðmundur sömuleiðis skilja vel að kjósendur snúi baki við VG.
„Katrín lét á sér skilja í Moggaviðtali að flokkur hennar eigi meiri samleið með Sjálfstæðisflokki en Samfylkingu (sem sé svo hægrisinnuð vegna samkrulls við Viðreisn eða eitthvað), sem ég vona nú að sé tímabundin villa. Nema hvað: við í Samfó stöndum í stað við 15 prósentin. Ég er ekki jafn hrifinn af „stöðugleikanum“ og Katrín og vil sjá flokkinn minn með meira fylgi, þó að þetta sé nokkuð yfir fylginu okkar í síðustu þingkosningum.“
Guðmundur Andri segir að fólk þurfi að hafa eitt grundvallaratriði í huga, en það er að sterk Samfylking sé forsenda þess að hægt verði að leiða saman ólíka flokka á vinstri vængnum.
„Við heitum nú einu sinni „Samfylking“ og erum alltaf að hugsa um það sem sameinar okkur vinstri menn frekar en hitt sem sundrar. Málið er þetta: Hvernig myndum við framsækna umbótastjórn jafnaðarmanna eftir næstu kosningar? Sterk Samfylking gegnir þar lykilhlutverki, eini flokkurinn sem getur leitt saman til dæmis Pírata og VG já og útskýrt fyrir Katrínu að Viðreisn er ekki hægra megin við Sjálfstæðisflokkinn.“
Fjallað var um Þjóðarpúlsinn í kvöldfréttum RÚV í kvöld. Samkvæmt honum er fylgi Sjálfstæðisflokks rúm 23 prósent, Samfylkingar tæp 15 prósent og Pírata tæp 14 prósent. VG, Viðreisn og Miðflokkurinn eru með tæplega 11 prósenta fylgi og Framsóknarflokkur 7,5 prósent. Þá eru Flokkur fólksins og Sósíalistaflokkurinn með um fjögurra prósenta fylgi.