Axel Pétur Axelsson, sjálftitlaður þjóðfélagsverkfræðingur og frambjóðandi til embættis forseta Íslands, segir að engin sönnun sé til fyrir því að jörðin sé hnöttur.
Axel Pétur og Björn Leví Gunnarsson, þingmaður Pírata, hafa rökrætt þetta fram og til baka í fjörugum umræðum í Stjórnmálaspjallinu á Facebook þar sem þingmaðurinn hefur reynt að sannfæra væntanlegan forsetaframbjóðanda um að jörðin sé í raun og veru hnöttur.
Nokkur þúsund ára sannanir
Öll þessi umræða byrjaði í síðustu viku þegar Margrét Friðriksdóttir bað Axel Pétur að útskýra hvernig hann fengi það út að jörðin væri ekki hnöttótt.
Axel svaraði því til að hann hefði ekki fullyrt að jörðin væri flöt þó „það liggi beinast við“ og engin sönnun væri til um að jörðin væri hnöttur. Um þetta höfðu skapast fjörugar umræður síðustu daga sem urðu ekki minna fjörugar þegar Björn Leví ákvað að blanda sér í þær í morgun.
Björn Leví segir í langri færslu að til séu nokkur þúsund ára sannanir fyrir því að jörðin sé ekki flöt. „Það er til dæmis rosalega einfalt að gera þá tilraun í dag. Til að byrja með hefur þú samband við fullt af fólki víðs vegar í kringum heiminn á sama tíma sem er á sömu breiddargráðu og spyrð það hversu hátt sólin er á lofti nákvæmlega þá. Svarið verður að sólin er mishátt á lofti, sem gæti ekki gerst ef jörðin væri flöt (nema sólin væri rosalega nálægt jörðinni),“ segir Björn meðal annars.
Axel Pétur svarar stutt og skorinort og segir: „Sólin er rosalega nálægt jörðinni...“
Björn Leví segir þá á móti: „Einmitt. Grunaði ekki Gvend,“ og reynir að varpa frekara ljósi á þá staðreynd að jörðin er ekki flöt og fjarlægð hennar frá sólinni.
„Nú hafa þó nokkrar atómsprengjur verð sprengdar á jörðinni. Þó ekki nema væri fyrir það eitt, þá vitum við þó ekki nema einungis vegna þess, að sólin er um 8 ljósmínútur í burt frá jörðinni. Fjöldamargar aðrar tilraunir, til dæmis háhraðamyndbandsupptaka af ljósinu sýnir nákvæmlega það sama.“
„Bull, bull og bull“
Hafi Björn Leví haldið að honum tækist að snúa á Axel Pétur skjátlaðist honum hrapallega.
„Ljóshraðamælitækin eru "kaliberuð" árlega til að aðlagast breytilegum ljóshraða . . . svokallaðar atómsprengjur eru tnt í stálröri,“ segir Axel Pétur. Þessu svarar Björn Leví: „Bull, bull og bull. Ég nenni ekki einu sinni að biðja þig um rökstuðning því ég veit að hann er verri en fullyrðingin hjá þér.“
Orðaskipti Björns Leví og Axels Péturs halda áfram þar sem Björn Leví reynir, án nokkurs árangurs, að sannfæra Axel Pétur um hver sannleikurinn í raun og veru eru.
„Pældu í því í augnablik hversu langsótt þetta er hjá þér. Ég er búinn að útvega þér _aðferð_ til þess að skoða það með beinum hætti hvernig lögun jarðarinnar er. Aðferð sem var þróuð fyrir nokkur þúsund árum síðan og snýst ekki um neinar flóknar aðferðir. Einfalt prik og málband. En nei, CIA sko og TNT í stálröri. Afsakið en nei. Þú þarft að horfa vel og lengi í spegil.“