Breskur lögmaður telur að ekki verði tekið tillit til tímans sem Gylfi Þór Sigurðsson hefur verið í farbanni verði hann dæmdur til vistar í fangelsi í kynferðisbrotamáli.
Þetta kemur fram í Fréttablaðinu í dag sem ræðir við Dino Nocivelli, breskan lögfræðing sem sérhæfir sig meðal annars í málum sem snúa að meintu kynferðisofbeldi gegn ólögráða einstaklingum. Dino getur ekki tjáð sig beint um mál Gylfa af lagalegum ástæðum en eins og greint var frá um helgina er mál Gylfa nú komið til saksóknaraembættisins sem tekur ákvörðun um hvort gefin verði út ákæra.
Dino segir að miðað við tímamörkin í málinu mætti vonast eftir niðurstöðu um næstu skref fyrir lok mars.
Eins og flestir vita var Gylfi handtekinn 16. júlí 2021 vegna gruns um kynferðisbrot gegn ólögráða einstaklingi. Stuttu síðar var hann látinn laus gegn tryggingu og hefur hann verið í farbanni síðan.
Margir hafa gagnrýnt málsmeðferðartímann en Dino segir ekkert óeðlilegt við tímalengd rannsóknarinnar sem slíka.
„Því miður getur refsiréttarkerfið á Englandi verið ansi hægfara og hefur þróunin verið í þá vegu undanfarið,“ segir Dino og bætir við að margar ástæður séu fyrir því.
„Það eru fjölmargar ástæður, allt frá eftirmálum vegna kórónuveirufaraldursins til vanfjármögnunar í málaflokki lögreglunnar, ákæruvaldsins, sakamáladómstóla og lagalegrar aðstoðar. Ástæður mögulegra tafa geta þó ekki verið notaðar sem afsökun fyrir áframhaldandi töfum á réttlæti fyrir alla þá aðila sem eru hluti af sakamálum.“
Dino segist vera þeirrar skoðunar að frestað réttlæti sé oft réttlæti hafnað og segir hann tafir á niðurstöðu í svona málum vera áhyggjuefni sem hafi áhrif, bæði á meinta þolendur sem og sakborninga.
„Þær tafir sem til vegna rannsóknar refsiréttarkerfisins er áhyggjuefni fyrir alla sem eiga í hlut. Því miður er þetta að verða að sífellt algengara og versnandi vandamál.“
