Hanna Katrín Friðriksson, þingflokksformaður Viðreisnar, segir ríkisstjórnina eiga að skammast sín fyrir að hafa ítrekað skorið niður fjármagn hjúkrunarheimila.
„Staðreyndin er sú að í tíð núverandi ríkisstjórnar hefur rekstrarfjármagn til hjúkrunarheimila verið markvisst skert og engin teikn eru á lofti um breytingar þar á. Staðan var því orðin slæm, en lengi getur vont versnað.“
Bendir hún á að hjúkrunarheimilin takist nú á við þriðju bylgju Covid-faraldursins, löskuð og sum fjárhagslega svelt.
„Þessi sveltistefna veldur því að hjúkrunarheimilin neyðast til að draga úr þjónustu við heimilisfólk. Það er einfaldlega þyngra en tárum taki. Og fyrir þá sem hafa áhuga á því hvernig stjórnvöld fara með skattfé almennings, má minna á að dvöl einstaklings sem ekki er hægt að útskrifa af Landspítala vegna skorts á úrræðum kostar að minnsta kosti um 70.000 kr. á sólarhring. Landspítalinn rekur svo biðdeild á Vífilsstöðum þar sem ríkið greiðir sjálfu sér 52.000 kr. á sólarhring fyrir þjónustu og aðstæður sem eru mun lakari en þær sem fólki býðst á hjúkrunarheimilum. Fyrir sólarhring á hjúkrunarheimilum greiðir ríkið hins vegar 38.000 kr. samkvæmt þjónustusamningi við rekstraraðila.“
Hanna Katrín segir „stríð“ ríkisstjórnarinnar við hjúkrunarheimili eiga sér sögu og birtist að einhverju leyti í heilbrigðisstefnu stjórnvalda sem samþykkt var 2019.
„Þessi fjölmörgu félög, stofnanir og fyrirtæki innan Samtaka fyrirtækja í velferðarþjónustu eiga það sameiginlegt að vera ekki ríkisrekin, heldur starfa samkvæmt þjónustusamningi við ríkið. Allt aðilar sem hafa um áratugaskeið verið mikilvægur hlekkur í íslenskri heilbrigðisþjónustu. En þetta eru hin óhreinu börn ríkisstjórnarinnar. Í einkarekstri.“
Tekur hún undir orð Gísla Páls Pálssonar, forstjóra Grundar og formanns Samtaka fyrirtækja í velferðarþjónustu, sem sagði ríkisstjórninni að skammast sín í pistli sem hann birti á vefsíðu Grundar.
Þar sakar hann stjórnvöld um að sveita öldrunarheimilin viljandi svo þau gefist upp og skili rekstrinum til ríkisins. Slíkt sé þegar farið að gerast. Grímulaus ríkisvæðing öldrunarþjónustunnar er lýsingin sem forstjórinn notar.
„Þar hittir hann naglann sennilega beint á höfuðið,“ skrifar Hanna Katrín. „Gríman er fallin.“