Þetta er það sem breytist á morgun: „Það þarf að grípa í handbremsuna“

30. júlí 2020
11:44
Fréttir & pistlar

Ríkisstjórnin kynnti í dag hertari aðgerðir hér á landi vegna þróun kórónaveirufaraldursins en síðustu daga hefur mikill fjöldi nýrra smita komið upp. Að sögn Svandísar Svavarsdóttir er nauðsynlegt að „grípa í handbremsuna“ til þess að koma í veg fyrir frekari smit.

Nýju reglurnar taka gildi um hádegi á morgun en samkvæmt nýju reglunum mega ekki fleiri en 100 manns koma saman á hverjum tíma og tveggja metra reglan verður að skyldu. Ef ekki er hægt að tryggja að tveir metrar séu milli fólks þarf fólk að vera með grímur sem hylja bæði nef og munn. Þá verður tekin upp tvöföld skimun við landamærin.

„Allar þær ráðstafanir sem hér eru gerðar innanlands eru í samræmi við það sem við þekkjum, við höfum gert þetta áður, við gerðum það vel og við getum gert það aftur vel ef við hjálpumst að og snúum bökum saman með tveggja metra millibili þá ættum við að komast í gegnum þennan skafl,“ sagði Svandís á fundinum.

Aðgerðirnar í heild sinni má sjá hér fyrir neðan:

  • Takmörkun á fjölda sem kemur saman miðast við 100 einstaklinga. Börn fædd 2005 eða síðar eru undanskilin.
  • Hvar sem fólk kemur saman og í allri starfsemi verði viðhöfð sú regla að hafa a.m.k. 2 metra á milli einstaklinga. 
  • Þar sem ekki er hægt að tryggja 2 metra fjarlægð milli ótengdra einstaklinga er krafist notkunar andlitsgrímu sem hylur nef og munn. Þetta á t.d. við um almenningssamgöngur, þ.m.t. innanlandsflug og farþegaferjur, og starfsemi s.s. hárgreiðslustofur og nuddstofur. Andlitsgrímur sem notaðar eru utan heilbrigðisþjónustu ættu að uppfylla kröfur sem settar eru fram í leiðbeiningum sóttvarnalæknis.
  • Vinnustaðir, opinberar byggingar, verslanir og þjónustufyrirtæki sem eru opin almenningi skipuleggi starfsemi sína í samræmi við ofangreint og tryggi að ekki séu fleiri en 100 einstaklingar í sama rými og að í minni rýmum séu ekki fleiri en svo að hægt sé að tryggja 2 metra fjarlægð milli einstaklinga. 
  • Verslanir, opinberar byggingar og þjónustufyrirtæki sem eru opin almenningi tryggi aðgang að handsótthreinsi fyrir almenning og starfsmenn við innganga og í grennd við yfirborð sem margir snerta s.s. snertiskjái og afgreiðslukassa, sinni vel þrifum og sótthreinsun yfirborða eins oft og unnt er og minni almenning og starfsmenn á einstaklingsbundnar sóttvarnir með merkingum og skiltum. 
  • Sundlaugar og veitingastaðir tryggi að gestir geti haft 2 metra bil á milli sín í öllum rýmum með fjöldatakmörkun í samræmi við stærð hvers rýmis.
  • Sóttvarnalæknir leggur til að starfsemi sem í eðli sínu felur í sér að gestir noti sameiginlegan búnað s.s. íþróttastarf, líkamsræktarstöðvar, spilakassar og spilasalir geri hlé á starfsemi eða sótthreinsi slíkan búnað milli notenda. 
  • Sóttvarnalæknir leggur til að söfn, skemmtistaðir og aðrir opinberir staðir geri hlé á starfsemi sé ekki hægt að tryggja að farið sé eftir fjöldatakmörkun eða að bil milli ótengdra aðila sé yfir 2 metrum. 
  • Opnunartími skemmti- og vínveitingastaða verður áfram til kl. 23:00.