Hersir Sigurgeirsson, dósent í fjármálum við Háskóla Íslands, sagði sig frá rannsókn Ríkisendurskoðunar á bankasölu Bankasýslunnar í dag vegna þess að Bankasýslan var ósátt með að hann hafi „lækað“ færslu sem lætur stór orð falla um framkvæmd sölunnar.
Samkvæmt heimildum Viðskiptablaðsinser um að ræða færslu Marinós G. Njálssonar, fyrrum stjórnarmanns Hagsmuna Heimilanna og eins helsta talsmanns þeirra á sínum tíma, þar sem sett er út á „klúður Bankasýslunnar í útboðinu“ og meinta tilraun viðskiptamiðilsins Innherja til að „fegra“ það.
Marínó birti færsluna 6. maí og óskaðir Ríkisendurskoðun eftir aðkomu Hersis 11. apríl.
„Þarna er ekki eitt orð um afslátt eða að slíkur afsláttur sé forsenda útboðsins. Það er heldur ekki talað um að hafna góðum tilboðum og taka lakari fram yfir. Ekki er heldur talað um að bjóða „hobbífjárfestum“ að taka þátt. Og loks er ekki talað um að hleypa að tilboðum sem eru svo lág, að þau ættu einfaldlega heima á markaði,“ segir í færslu Marínós.
Glæra sem Innherji birti úr téðri kynningu er gerð að sérstöku umtalsefni og segir Marinó hana staðfesta „að framkvæmdin var önnur en kynnt var. Auk þess segir glæran ekkert til um hvaða ferli söluaðilar áttu að nota við val á fagfjárfestum, hvaða fjárfestar töldust hæfir fjárfestar eða hve lág tilboð voru ásættanleg.“ […] „Ef eitthvað er, þá sannar glæran að aðferðin var illa kynnt, var illa skilgreind og bauð upp á það klúður sem varð.“
Á glærunni hafi auk þess ekkert komið fram um ferlið við val á fagfjárfestum, hverjir teldust hæfir fjárfestar „eða hve lág tilboð voru ásættanleg.“.
Hér að neðan má sjá færslu Marínós.
