„Jón er að fá menn með fjölbreytta reynslu og ég skil ekki af hverju menn eru að gagnrýna það. Menn geta haft ýmsar skoðanir í pólitík,“ segir Brynjar Níelsson nýr aðstoðarmaður nýs dómsmálaráðherra Jóns Gunnarssonar í samtali við Vísi.
„Ekki héldu þeir að hann myndi fá einhverja menn úr vinstri flokkunum til að aðstoða sig? Þeir hafa kannski reiknað með því, ég veit það ekki. En það þarf að benda Andrési á að það eru til lyf við flökurleika,“ segir Brynjar við Vísi.
Þar er auðvitað rætt tíst Andrésar Inga Pírata um Jón og Brynjar: „Forsætisráðherra sagði í gær að baráttan gegn kynbundnu ofbeldi og bætt staða brotaþola verði í forgangi hjá ríkisstjórninni. Þetta er teymið sem á að stýra baráttunni,“ skrifar Andrés Ingi og lætur ælubroskalla fylgja.
Vísir spyr Brynjar hvers vegna hann sé kominn aftur á þing bakdyramegin, hvort mötuneytið sé svona gott?
„Nei, það er það nú ekki en einhvers staðar verður maður að borða. En það var sem sagt óskað eftir þessu þá verður maður bara við því nema einhver fyrirstaða sé. Þetta er auðvitað bara tímabundið.“
Forsætisráðherra sagði í gær að baráttan gegn kynbundnu ofbeldi og bætt staða brotaþola verði í forgangi hjá ríkisstjórninni. Þetta er teymið sem á að stýra baráttunni. 🤮🤮🤮https://t.co/VUAn58OJ0a
— Andrés Ingi (@andresingi) December 2, 2021
