Sveinn Arnarsson, sérfræðingur hjá skattinum og fyrrverandi blaðamaður, hóf þráð á Twitter í dag þar sem hann setti út á skort á frelsi í kringum landbúnaðarafurðir. Það sem honum þykir skjóta hvað skökkustu við er sú staðreynd að háir tollar séu settir á landbúnaðarafurðir sem ekki eru framleiddar hér á landi.
Sveinn byrjar á því að nefna kýpverskan Halloumi ost. „Þetta er Halloumi ostur frá Kýpur. Á hann eru settir bilaðir verndartollar við innflutning til Íslands. Það eitt og sér er áhugavert. En reiknum þetta aðeins út.“
Hefst þá reikningur. „Gefum okkur þá forsendu að kílóverðið af Halloumi osti þarna úti sé um 1.300kr. (Það er hægt að fá allavegana gæði og jarí jarí en 1.300 karl er alveg hægt að gefa sér í þessu reikningsdæmi.),“ segir Sveinn.
Hann heldur áfram: „Ákveðum að við ætlum að flytja inn 100 kíló af þessum osti og að sendingarkostnaðurinn sé í kringum 50 þúsund. Þá lítur reiknidæmið svona út: Tollflokkunin á þessum osti er 0406.9000 Annar ostur. Þá sjáum við að Tollurinn er um 150 þúsund og vsk. ofan á það um 36 þúsund krónur. (Eitthvað kostar síðan að sækja um leyfi Matvælastofnunar).“
„Kostnaðurinn við vöruna sjálfa er minni en við tolla og vsk. Þar með er næstum sjálfhætt að flytja inn vöruna til sölu því þú nærð aldrei neinum ágóða í neinu mæli,“ segir Sveinn og heldur áfram: „Það áhugaverða er að þessi ostur er að mestu unninn úr geita- og ærmjólk. Ég hringdi í MS um daginn til að forvitnast hversu mörg kíló af ostum væru framleiddir hjá þeim úr geita- og eða ærmjólk. Svarið kom mér ekki á á óvart ( 0 kg).“
Þar með líkur hann reiknikúnstunum og upplýsingagjöfinni og kastar því næst fram spurningu: „Hvað er verið að vernda og af hverju er svimandi tollur á vöru sem er ekki framleidd hér á landi ?“ spyr Sveinn.
Undir lok þráðarins beinir hann spjótum sínum að ríkisstjórnarflokkunum þremur, Framsókn, Vinstri grænum og Sjálfstæðisflokki. Auk þess merkir hann einn ráðherra í hverjum flokki, Sigurð Inga Jóhannsson, Áslaugu Örnu Sigurbjörnsdóttur og Svandísi Svavarsdóttur. Hann krefst skýrra svara og skjótra viðbragða.
Hvar er frelsið þegar kemur að landbúnaðarafurðum sem eru ekki einu sinni framleiddar hér á landi:
— Sveinn Arnarsson (@SveinnArnarsson) October 13, 2021
- Þráður