Sveinn H. Guðmarsson, fyrrverandi fréttamaður og upplýsingafulltrúi hjá utanríkisráðuneytinu, segir frá spaugilegu atviki á Twitter-síðu sinni sem gerðist í morgun.
Sveinn segir að hann hafi skellt sér í klippingu og sett upp andlitsgrímu í fyrsta sinn. Eitthvað fannst honum gríman þó óþægileg og hún hefta öndunina fullmikið, eins og hann orðar það.
„Hárgreiðslukonan benti mér þá á að ég væri með þrjár grímur fyrir andlitinu en ekki eina. #covidlífið,“ segir Sveinn í færslunni.
Eins og kunnugt er þarf nú að nota andlitsgrímur þar sem ekki er hægt að tryggja tveggja metra fjarlægð milli ótengdra einstaklinga. Þetta á til dæmis við um hárgreiðslustofur og nuddstofur svo dæmi séu tekin.