Hæstaréttarlögmaðurinn Sveinn Andri Sveinsson, er allt annað en sáttur með þá staðreynd að hér á landi sé rekin ríkiskirkja sem er fjármögnuð af skattféi landsmanna. Þetta kemur fram í færslu hans á Facebook er hann deilir frétt RÚV um að kirkjuþing sé sett í skugga hagræðingarkröfu.
„Gríðarleg tímaskekkja þessi ríkiskirkja. Hafi fólk einhverja þörf á því að tilbiðja ímyndaðan vin, þá er það bara þeirra mál,“ skrifar Sveinn Andri.
„Slík tilbeiðsla á hins vegar að vera í höndum sjálfstæðra safnaða sem hvorki ríki né sveitarfélög hafa afskipti af. Það er lágmarkskrafa á 21. öld að fullkominn aðskilnaður ríkis og kirkju eigi sér stað. Þangað til ríkir ekki trúfrelsi í landinu,“ skrifar hann enn fremur.
Í frétt RÚV segir að fjölmörg mál liggja fyrir á kirkjuþinginu meðal annars hagræðingartillaga sem felur í sér að fækka prestum kirkjunnar á landsbyggðinni um tíu og hálft stöðugildi og draga úr sérþjónustu presta. Á sama tíma verði stöðugildum fjölgað á suðvesturhorninu.
Kirkjan hefur verið rekin með halla og gengur tillagan út frá því að miðað við tekjur hennar þurfi að fækka stöðugildum úr 145 í um 135.
