Styrmir Gunnarsson, fyrrverandi ritstjóri Morgunblaðsins og áhrifamaður í Sjálfstæðisflokknum til margra ára, segir að það gæti reynst Sjálfstæðisfloknum hættulegt að selja Íslandsbanka á þessum tímapunkti.
Styrmir skrifar um þetta á bloggsíðu sína og bendir á að tæpir tveir áratugir séu liðnir frá einkavæðingu bankanna sem hafði alvarlegri afleiðingar en nokkurn gat órað fyrir á þeim tíma.
„Þess vegna er ekki óeðlilegt að það gæti efasemda nú þegar umræður eru hafnar um nýja einkavæðingu. Þær efasemdir snúast fyrst og fremst um það, hvort nægilegar breytingar hafi verið gerðar á lagaumhverfi bankanna til að koma í veg fyrir, að leikurinn verði endurtekinn,“ segir Styrmir.
Forystumenn ríkisstjórnarflokkanna hafa lýst því yfir að nú sé rétti tímapunkturinn til að selja bankann og gæti það jafnvel gerst í sumar. Gengið verður til Alþingiskosninga í september næstkomandi og hefur Sjálfstæðisflokkurinn mælst stærstur í skoðanakönnunum að undanförnu.
Styrmir segir að velta megi því fyrir sér hvort fyrirhuguð sala á hlut ríkisins í Íslandsbanka geti verið pólitískt hættuspil og þá sérstaklega fyrir Sjálfstæðisflokkinn.
„Vegna forystu flokksins fyrir einkavæðingu bankanna á sínum tíma má finna á meðal fólks efasemdir um að flokknum sé treystandi fyrir því, að hafa forystu um einkavæðingu banka á nýjan leik. Og í ljósi þess, að þingkosningar eru í september er nokkuð ljóst að slíkar efasemdir geta orðið óþægilegur þáttur í kosningabaráttunni, jafnvel þótt salan hafi þá þegar farið fram. Það getur snúizt um það hverjir hafi orðið stærstu kaupendur og á hvaða verði hlutur í bankanum hafi verið seldur,“ segir Styrmir sem spyr að lokum:
„Ætli þessi þáttur málsins hafi komið til umræðu í þingflokki Sjálfstæðisflokksins?“
