Magnús Kristinsson segir farir sínar ekki sléttar eftir úrslitaleik FH og Víkings í Laugardalnum í gær.
„Ég hef upplifað ýmislegt á fótboltagæslu á Laugardalsvelli undanfarin ár en bikarleikur Víkings og FH er dropinn sem fyllti mælinn hjá mér. Ég stóð allan leikinn úti á velli fyrir framan stuðningslið Víkings. Þar blandaðist saman rjómi stuðningsmanna liðsins; börn frá tíu ára aldri, drukkin ungmenni og eldra fólk í misjöfnu ástand,“ skrifar Magnús.
„Framkoma þessa hóps var til háborinnar skammar fyrir íþróttina og liðið. Rusl og svívirðingar flugu yfir gæsluliðið með reglulega millibili. Kveikt var í að minnsta kosti þrem blysum (sami aðilinn kveikti í tveim þeirra). Einn hljóp inn á völlinn - ekki einu sinni, heldur tvisvar. Þó honum væri vísað út af vellinum, þá klifraði hann bara yfir girðinguna og kom sér aftur inn á völlinn eða í stúkuna. Níðsöngvar voru einnig sungnir um FH liðið, eitthvað á þá leið að barnaníðingar væru í þeirra hópi. Man ekki orðrétt hvernig þessi ógeðfelldi söngur var.“
„Getu- og viljaleysi KSÍ virðist vera algert. Þora þau ekki að taka á þessari hegðun, því þá komi færri áhorfendur á leikina? Lögreglan vill ekkert gera, kannski af því að þá þurfa þeir að skrifa skýrslu?“ spyr Magnús.
„Á meðan færir þessi hópur sig upp á skaftið og verður aðeins verri á næsta leik. Það endar síðan eflaust með alvarlegu slysi fyrr en síðar.
Get þó glatt mig við að þessi hópur er ólíklegur til að komast inn á völlinn sem leikmenn. Lítur út fyrir að þeir endi frekar sem góðkunningjar lögreglunnar (sem er reyndar ekki gleðilegt).
Það sem fór þó mest fyrir brjóstið á mér var hversu mörg börn voru þarna í hópnum innan um drukkna ólátabelgi. Hvar voru foreldrar þessara barna? Þarna voru ekki fyrirmyndir barna.
Auðvitað var þarna fólk með viti inn á milli sem reyndi að draga úr skrílslátum. En því miður átti sá hópur undir högg að sækja. Skemmdu eplin meðal stuðningsmanna Víkings voru bara of mörg.“
„Einnig var sorglegt að sjá starfsfólk og leikmenn Víkings fagna með bullunum eftir leikinn. Eins og stuðningsliðið væri hetjur sem þakka þyrfti fyrir góðan stuðning og prúða framgöngu.
Ég mun ekki taka þátt í gæslu á fleiri bikarleikjum, meðan öryggi gæslufólks verður ekki betur tryggt af KSÍ,“ skrifar Magnús að lokum.