Steinunn yfirlæknir minnir á hvers vegna dánartíðnin er svona lág

29. október 2020
13:44
Fréttir & pistlar

„Ástæðan fyrir því að dánartíðni vegna Covid-19 er ekki hærri er einfaldlega sú að veiran hefur ekki breiðst út í samfélaginu á óstjórnlegan hátt vegna þeirra sóttvarnaraðgerða sem hafa verið viðhafðar,“ segir Steinunn Þórðardóttir, yfirlæknir á öldrunardeild Landspítalans, í færslu á Facebook. Færslan hefur vakið mikla athygli en hún er andsvar við gagnrýni sem sóttvarnaraðgerðir stjórnvalda hafa fengið á sig.

„Það að halda því fram að þetta sé á einhvern hátt eðlilegt ástand sem við getum siglt í gegnum án sóttvarnaraðgerða er fjarstæða hverjum þeim sem þekkir til innan spítalans,“ segir Steinunn. Ef þeim veiku fjölgi þá þurfi líklega að loka öðrum deildum á móti, nefnir hún sem dæmi gigtardeild eða taugadeild, þeir sjúklingar þurfi þá að fara annað. „Hvaða starsfólk á að sinna öllum þessum Covid-19 veiku sjúklingum, auk allra hinna sem spítalinn er venjulega fullur af? Við erum með nánast ekkert ónæmi á samfélaginu fyrir þessari veiru. Sé henni sleppt lausri munu mjög margir veikjast á mjög stuttum tíma og mjög margir þeirra þurfa aðkomu spítalans. Það er einfaldlega augljóst að það er ekki gerlegt.“

Ef holskefla COVID-19 veikinda dyndi á spítalanum núna myndi annar og verri veruleiki blasa við.

„Aftur er farið að bera á háværri umræðu um að Covid-19 sé með lægri dánartíðni en flensa, að það séu ekki svo margir innlagðir á spítala vegna veirunnar og að það væri jafnvel betra fyrir alla að hafa samfélagið opnara og leyfa veirunni að dreifa sér.“

Þeir sem gagnrýni harðar sóttvarnaraðgerðir hafi ekki innsýn inn í stöðuna á spítalanum, allt sé nú erfiðara en áður og starfsfólk í stöðugri smithættu.

„Á Landspítala í Fossvogi eru fjórar lyflækningadeildir, bráðalyflækningadeild, smitsjúkdómadeild, lungnadeild og gigtardeild, auk öldrunarlækningadeildar, taugadeildar og skurðdeilda. Allt árið um kring eru þessar fjórar lyflækningadeildir fullar af sjúklingum með tilheyrandi vandamál, alvarlega smitsjúkdóma, lungnasjúkdóma o.sv.fr. Eins og staðan er í dag eru bæði smitsjúkdómadeildin og lungnadeildin fullar af sjúklingum með Covid-19. Þetta eru sjúklingar sem eru það veikir að þeir þurfa sannarlega á sjúkrahúsinnlögn að halda og þurfa mikla þjónustu.

Öll verk á þessum deildum eru þyngri í vöfum en venjulega vegna sóttvarna, þ.m.t. klæðnarar í og úr hlífðarfötum. Eins býr starfsfólk við áhyggjur af því að smitast sjálft og verða jafnvel alvarlega veikt, eða bera smit í aðra sjúklinga eða eigin fjölskyldumeðlimi. Veikindum sjúklinga með “venjuleg” vandamál sem alla jafna hefðu lagst inn á þessar deildir verður að sinna annars staðar, en það er gríðarleg áskorun. Þessar tvær heilu legudeildir fullar af Covid-19 veikum eru hrein viðbót við þegar yfirfullt sjúkrahús.“