Steinunn Ólína Þorsteinsdóttir óskar eftir aðstoð við að finna hjól eiginmanns síns, Stefáns Karls heitins, en hún deildi fyrr í dag færslu þar sem hún greindi frá því að hjólinu hafi verið stolið og hefur þeirri færslu verið deilt víða.
Að sögn Steinunnar hefur því líklegast verið stolið einhvern tímann á síðustu tveimur vikum en það stóð læst á stigagangi í skrifstofuhúsnæði Sprettu á Granda. Hjólið er merkt honum með merkimiða en Steinunn bendir á að líklegast væri auðvelt að fjarlægja miðann.
„Ef einhver hefur hugmynd um hvar það er niðurkomið þætti mér vænt um að fá af því fregnir og megi þjófurinn hugsa sig um tvisvar og skila hjólinu ellegar fá svo harðvítuga iðrakveisu að ekkert lækni hana nema linnulaus góðverk héðan af,“ segir Steinunn í færslunni og birtir með færslunni mynd af Stefáni þar sem hann stendur hjá hjólinu.