Steinunn Ólína Þorsteinsdóttir, ritstjóri Kvennablaðsins, segir að Katrín Jakobsdóttir forsætisráðherra sé stórhættuleg. Steinunn Ólína gerir þá ákvörðun Kára Stefánssonar, forstjóra Íslenskrar erfðagreiningar, að hætta að skima fyrir COVID-19 á landamærunum frá og með næstu viku að umtalsefni í pistli á vef Kvennablaðsins.
„Skrípaleikurinn í kringum skimanir á landamærum Íslands verður sífellt skrýtnari og umræðan enn skringilegri. Um margra mánaða skeið hefur ríkisstjórn Íslands reitt sig á greiðasemi og fjárútlát erlends stórfyrirtækis til að tryggja lýðheilbrigði án þess að hafa um verklagið nokkurn samning,“ segir Steinunn Ólína og bætir við að um langt skeið hafi Kári hamrað á því að ríkið verði að geta séð um þetta sjálft. „Margtuggðar“ ábendingar forstjórans hafi stjórnvöld hunsað.
„Kári gaf ríkisstjórninni fimm daga til að bregðast við en þessir fimm dagar eru vísast bara leið til afhjúpunar. Kári hefur nær lagi gefið ríkisstjórninni nærri fimm mánuði til að axla þá ábyrgð sem ríkisstjórninni ber að gera. Kára Stefánssyni eða ÍE ber ekkki skylda til gera nokkurn skapaðan hlut,“ segir Steinunn og bætir við að sú ríkisstjórn sem nú er við völd sé ekki ríkisstjórn fólksins í landinu.
„Kári Stefánsson hefur með eftirminnilegum hætti afhjúpað allsberu keisarastjórnina sem er ekki bara frek, siðlaus, óábyrg og tilætlunarsöm heldur augljóslega getu-og ráðalaus og að auki með hugann við annað,“ segir hún.
Hún segir að ekki þurfi að fjölyrða um geðslag Kára Stefánssonar en það sé algjört aukaatriði í þessu samhengi.
„Hann er ekki þjóðkjörinn einstaklingur. Það er hinsvegar Katrín Jakobsdóttir sem bregst nú sem endranær og sýnir svart á hvítu að hún veldur enganveginn hlutverki sínu og er beinlínis, með tilætlunarsemi, og yfirlæti, stórhættulegur forsætisráðherra.“
Pistil Steinunnar má lesa í heild á vef Kvennablaðsins.
