„Ég er lífhrædd í fyrsta sinn á ævinni og kann því illa, hef lifað í frjálsu falli óhrædd við allt og alla fram á þennan dag. Núna er ég afar meðvituð um það að börnin mín yngstu eiga bara eitt foreldri og að það er mikilvægt að ég standi upprétt eitthvað aðeins lengur,“ þetta skrifar Steinunn Ólina Þorsteinsdóttir, leikkona og ritstjóri Kvennablaðsins í pistli á Facebook síðu sinni í kvöld.
„Það er í mér beygur og ég get ekki vel skýrt af hverju hann stafar. Mér líður ekkert ósvipað og síðustu mánuðina sem Stefán lifði. Þegar maður vissi að það var enga stjórn hægt að hafa á framgangi mála, allt færi á versta veg. Nú kann einhver að segja að ég sé svartsýn og kannski takist íslenskum stjórnvöldum að hafa hemil á veiruskrattanum með ákvörðunum sínum. En eftir stendur að fólk mun veikjast mikið og deyja hér á Íslandi af völdum Covid-19 og það mun snerta okkur öll. Það mun auka á kvíða okkar þegar fólk fer að týnast af sjónarsviðinu. Jafnvel þótt við þekkjum viðkomandi ekki neitt,“ segir hún þar enn fremur.
Hugprúða framvarðarsveitin að gera sitt besta
Hún segist fylgjast með fréttum, ekki bara innlendum og hefur reynt að lesa sér til um ástandið víða um heim sem sjúkdóminn. „Mér líður betur þegar mér finnst ég hafa kynnt mér eitthvað sjálf og mér lýst sannarlega ekkert á blikuna og skynja að auki áþreifanlega vanmátt framvarðarsveitarinnar hugprúðu. Þau eru að gera sitt besta og augljóslega afbragðsfólk en þau eru hvorki spámenn né töframenn þótt þau reyni að feta vandratað einstigi upplýsingar og kvíðastjórnunar,“ skrifar Steinunn sem spyr jafnframt hvað við getum gert?
„Tilmæli til fólks eru alls staðar þau sömu. Gætið ykkar með einu ráðunum sem í boði eru: Haldið ykkur frá öðru fólki en frískum fjölskyldumeðlimum ef þess er nokkur kostur. Og það gefur okkur öllum tilgang í þessari baráttu að gera einmitt það.“
Hún segir það taki á taugarnar að vera heima með börnum sínum öllum stundum. „Þeim finnst ég heldur leiðinlegur kennari og ég sting ekki upp á nógu skemmtilegum hlutum,“ skrifar Steinunn sem þakkar jafnframt fyrir því að börnin séu hraust. Hún hvetur síðan landsmenn til að virða samkomubannið og gæta þess að smitast ekki eða smita aðra. „Það var raunalegt að horfa á Víði á fundinum í dag þar sem hann var forviða á hegðun fólks og íþróttafélaga sem hundsa samkomubann. Við eigum að vera forviða líka. Að fylgja þessum fyrirmælum er nú það minnsta sem við getum gert fyrir samfélagið okkar,“ skrifar hún að lokum.