Stefán lætur mann og annan heyra það: „Til andskotans með þau sem básúna annað“

„Helgina sem leið hélt vinsæll kanadískur YouTube-ari fyrirlestur í Háskólabíói, sá ku vera sálfræðingur að mennt. Hann skrifaði einu sinni bók stílaða að ungum karlmönnum, hvar hann hvatti þá til þess að borða hollan mat og standa beinir í baki. Mörgum þóttu þetta nýstárlegar hugmyndir.“

Svona hefst pistill Stefáns Ingvars Vigfússonar, bakþankahöfundar Fréttablaðsins, í blaðinu í dag. Í pistli sínum skrifar hann meðal annars um heimsókn Jordans Peterson til Íslands og afstöðu nafntogaðra einstaklinga eins og Brynjars Níelssonar, aðstoðarmanns dómsmálaráðherra, vegna úrskurðar Hæstaréttar Bandaríkjanna í máli sem kennt er við Roe vs. Wade.

Um Jordan Peterson og íslenska karlmenn segir hann:

„Það truflar þá ekkert að umræddur segi konur eingöngu mála sig til þess að tæla samstarfsfólk sitt. Né þótti þeim tiltökumál að hann segi lækna sem framkvæma nauðsynlegar aðgerðir til kynleiðréttingar vera slátrara. Nei, þeim fannst of merkileg sú hugmynd að vingast við fólk sem vill manni vel. Þessi fyrirlestur var sömu helgi og leghafar vestanhafs misstu sjálfræði yfir eigin líkama, sem aðstoðarmaður ráðherra sagði rétta ákvörðun, í ljósi hans takmarkaða skilnings á bandarísku lagaumhverfi. Þetta gerði hann í staðinn fyrir að taka siðferðislega afstöðu. Þessi fyrirlestur, þessa manns sem veitist að tilverurétti kynsegin fólks, var haldinn sömu helgi og skoðanabróðir hans í Noregi fór vopnaður inn á hinsegin bar og myrti tvær manneskjur.“

Hann lætur Sigmund Davíð einnig finna fyrir því.

„Á sama tíma lét þingmaður og alræmdur skattsvikari það endalaust þvælast fyrir sér hvað kona sé nú eiginlega, eins og honum sé ekki drullusama. Þetta er hundaflauta og hundarnir eru þeir sömu og sátu umræddan fyrirlestur. Við þykjumst vera hinseginvæn jafnréttisparadís, en staðreyndin er sú að þessar lífshættulegu hugmyndir eru á yfirborðinu. Þær eru á Alþingi og þær eru plássfrekar í fjölmiðlum og þeir eru aumir mennirnir sem viðra þær. Leghafar eiga að eiga algjört og ótvírætt vald yfir eigin líkama. Trans fólk er til, trans börn eru til – til allrar hamingju. Til andskotans með þau sem básúna annað.“