Segja mætti að íslenska prjónasamfélagið sé í uppnámi eftir að netverji setti inn fyrirspurn inn á Facebook hópinn „Handóðir prjónarar“ í gærkvöldi um hvort fólk heðfi hugmyndir um það hvernig hægt væri að veganvæða lopapeysuuppskrift.
Óhætt er að segja að umræðan hafi orðið nokkuð ljót í hópnum og neyddist viðkomandi til að eyða innleggi sínu. Margrét Hlín Snorradóttir vekur á því athygli á hópnum þar sem hún biður netverja í hópnum um að taka tilit til lífstíls manna og gilda þar inni.
„Það bregst ekki að ef minnst er á veganisma í einhverjum pósti hérna þá hrannast inn hláturkallarnir og niðrandi komment. Mér virðist höfundur hafa eytt innleggi sínu sem var hérna áðan út af öllu skítkastinu. Hún var bara að spyrja hvort fólk hefði hugmyndir um hvort hægt væri að veganvæða lopapeysuuppskrift. Ef ykkur finnst það asnalegt, er svo mikið mál að bara sleppa því að kommenta og skrolla framhjá?“ spyr Margrét Hlín við miklar undirtektir.
Hún segist nánast verða sorgmædd í hvert sinn sem minnst er á veganisma í hópnum. „Vegna þess að það er aldrei hægt að bara ræða spurninguna eða upprunalega póstinn, umræðan snýst alltaf upp í hvað það sé arfaheimskt að vilja ekki nota ull og ef ég hætti mér til að taka þátt þá fer allur tíminn í að reyna að útskýra þá ákvörðun fyrir fólki sem samt augljóslega hefur engan áhuga á svarinu.“
Hún minnir á að orð særa. Enginn þurfi að styðja vegaisma eða vera sammála honum til að vera kurteis. Flestir netverjar í hópnum þakka Margréti fyrir innlegg sitt. Einhverjir spyrja meðal annars hvort eitthvað sé til sem heita megi vegan prjónaskapur. „Við erum með prjónasíðu ekki vegansíðu,þessi umræða er komin út í þvælu !!“ skrifar einn meðlimur hópsins við innleggið.
