Sprengjusveit Landhelgisgæslunnar, kölluð séraðgerðasveitin, var að störfum í Þorlákshöfn í dag.
Greint er frá því á vef Fréttablaðsins að Lögreglan á Suðurlandi hafi beðið um aðstoð vegna hlutar sem fannst í Þorlákshöfn. Þegar betur var að gáð reyndist ekki hætta á ferðum. Reyndist hluturinn vera einhverskonar leikfang.
Á meðan sveitin var að skoða leikfangið til að tryggja að það væri alveg örugglega ekki sprengja mætti vegfarandi á svæðið og lét lögreglu fá fallbyssukúlu úr síðari heimsstyrjöld. Kúlan reyndist virk.
Sprengjusérfræðingar gæslunnar hófust umsvifalaust handa við að undirbúa eyðingu hennar. Á öðrum tímanum var fallbyssukúlunni eytt og tókst vel að sögn Ásgeirs Erlendssonar, upplýsingafulltrúa Landhelgisgæslunnar. Hann segir ekki óalgengt að fólk leiti til lögreglu eða gæslunnar vegna muna úr seinni heimsstyrjöldinni, sem leynast víða í náttúrunni og á heimilum.
