Ungur maður á milli fertugs og fimmtugs sem var við góða heilsu og ekki í áhættuhópi, var fluttur á börum út úr fjölbýlishúsi með súrefnisgrímu fyrir vitum sér í gær. Maðurinn hafði verið í einangrun á heimili sínu. Steinar B. Aðalbjörnsson, næringarfræðingur, greinir frá þessu á samfélagsmiðlum og birtir frásögnina í þeim tilgangi til að ýta við fólki að fara eftir ráðum Víðis Reynissonar yfirlögregluþjóns, sem hefur gagnrýnt að ítrekað sé verið að brjóta samkomubann eða tveggja metra regluna.
Steinar hefur frásögnina á þessum orðum:
„Sönn íslensk sorgarsaga frá því í gær. Að fjölbýlishúsi kom sjúkrabíll. Inn hlupu sjúkraflutningamenn. Stuttu seinna kom annar sjúkrabíll. Inn hlupu fleiri sjúkraflutningamenn.“
Hann bætir við að fjórir sjúkrafluttningarmenn hið minnsta hafi farið inn í íbúðina. Allir í klæðnaði til að verjast COVID-19. Steinar segir að sjúkrafluttningarmennirnir hafi farið inn í íbúð þar sem einstæður faðir er búsettur, á milli fertugs og fimmtugs. Steinar segir:
„Hann er almennt við góða heilsu, ekki í áhættuhópi, reykir ekki né er of feitur. Hann á tvö ungmenni, stúlku og dreng. Hann var í einangrun heima hjá sér,“ segir Steinar og bætir við:
„Stúlkan kemur að húsinu um það bil þegar sjúkraflutningamennirnir koma, hún er hágrátandi. Hún sest niður úti á plani. Við hliðina á bílnum sínum, sem lagt var á planinu. Hún hjúfrar sig saman og heldur áfram að gráta.“
Stuttu seinna komu sjúkrafluttningarmennirnir út úr íbúðinni. Þeir voru með börur á milli sín.
„Á börunum lá pabbinn með súrefnisgrímu fyrir vitum sér,“ segir Steinar og bætir við:
„Hann er smitaður af COVID19 og berst nú fyrir lífi sínu.“
Þá beinir Steinar að lokum þessum mikilvægu skilaboðum til Íslendinga.
„Leyfðu fólki í kringum þig að njóta vafans, hvort sem það er í búðinni eða annars staðar! Ekki vera kjáni - gerðu eins og Víðir biður þig um!“
