Sölvi Antonsson, veitingamaður, vill að áfengissala verði heimiluð í Hlíðarfjalli til klukkan 20:30 á veturna. Skíðasvæðið í Hlíðarfjalli er eitt það glæsilegasta og vinsælasta á landinu og sækja þúsundir landsmanna skíðasvæðið heim á ári hverju.
Óhætt er að segja að ekki séu allir á eitt sáttir við hugmynd Sölva en hann tók við veitingarekstri á skíðasvæðinu um áramótin undir merkjum fyrirtækisins Ghost Mountains ehf.
Fjallað er um málið í Morgunblaðinu í dag en þar kemur fram að málið hafi verið til umræðu hjá bæjarráði Akureyrar að undanförnu. Hefur verið óskað eftir umsögnum og áliti frá lögreglu, slökkviliði og heilbrigðiseftirliti svo eitthvað sé nefnt.
„Að geta fengið sér aðeins í tána ætti að auka á upplifun fólks sem kemur í fjallið,“ segir Sölvi í viðtali við Morgunblaðið og segir að markmiðið sé að skapa góða stemningu í Hlíðarfjalli sem líkist því sem gerist á skíðasvæðum í Evrópu.
„Bjórkolla með kröftugri kryddpylsu gefur lífinu gildi. Sé áfengi eða bjór seldur í plastglösum í fjallinu verða ekki dósir og flöskur út um allt ef fólk kemur með veigarnar með sér á svæðið. En ég ítreka líka að við munum ef til þess kemur að leyfi til áfengissölu fáist verða með arnaraugu á því að fólk sé ekki ölvað í skíðabrekkunum, með allri þeirri slysahættu sem því kann að fylgja,“ segir Sölvi við Morgunblaðið.
Sóley Björk Stefánsdóttir, áheyrnarfulltrúi Vinstri grænna, er mótfallin því að áfengissala verði leyfð í fjallinu og segir að sala áfengis gangi gegn forvarnarstefnu Akureyrarbæjar.
„Satt að segja finnst mér þessi hugmynd alveg út í hött og andstaða mín er alveg skýr,“ sagði Sóley við Morgunblaðið og óttast til dæmis að hætta geti skapast sé skíðafólk undir áhrifum áfengis.
