Undanfarna daga hafa gengið háværar sögusagnir um að fjölmiðlamaðurinn Sölvi Tryggvason hafi keypt sér kynlífsþjónustu og gengið í skrokk á vændiskonu og hefur málið verið mikið rætt á samfélagsmiðlum, þrátt fyrir að hann hafi ekki verið nafngreindur. Sölvi birti færslu á Instagram-síðu sinni þar sem hann svaraði þessum slúðursögum og segir þær úr lausu lofti gripnar.
„Síðustu daga hafa gengið ótrúlega rætnar slúðursögur um mig í þjóðfélaginu sem eiga sér enga stoð í raunveruleikanum,“ skrifar Sölvi og birti skjáskot af málaskrá lögreglu frá 1. apríl þar sem engin mál eru skráð á hann. „Eins og þarna kemur skýrt fram hefur lögreglan ekki haft nein afskipti af mér, bein eða óbein, á þeim tíma sem þessi atvik eiga að hafa átt sér stað. Þetta verður ekki skýrara. Það er ekkert til í þessum slúðursögum.“
Hann segir málið hafa haft mikil áhrif á sig og fjölskyldu sína, hann hafi verið sem lamaður síðan sögurnar bárust honum til eyrna. Fjölmiðlar hafi ítrekað sett sig í samband við hann og spurt hann út í málið en einn fjölmiðill gerði frétt um málið án þess þó að nafngreina Sölva. Hann hafi átt erfitt með að trúa að fólk skildi dreifa slíkum orðrómi um sig.
„Ég óska engum að lenda í þeirri hakkavél sem slúðursögur eru. Þær eru mannskemmandi, niðurbrjótandi og hafa valdið mér og mínum meira hugarangri en ég hefði getað ímyndað mér. Ég verð alltaf jafn undrandi á að fólk sé til í að tala illa um náungann; fólk af holdi og blóði með tilfinningar og fjölskyldu. Hættum þessu!“ segir Sölvi að lokum.